काठमाडाैं, बैशाख १० ।
रोजगारीका लागि अनलाइनबाटै मेडिकल जाँच भनेर नग्न भिडियाे बनाएर ब्ल्याकमेलिङ गरेको अभियाेगमा एक जना पक्राउ परेका छन् ।

पक्राउ पर्नेमा सिन्धुलीको तीनपाटन गाउँपालिका-८ घर भएका र हाल काठमाडौं महानगरपालिका बुढानीलकण्ठ बस्ने ३६ वर्षीय कमलप्रसाद अधिकारी रहेका छन् । उनलाई केन्द्रीय साइबर ब्यूरोको टोलीले गत शनिबार पक्राउ गरेको हो ।

पाथीभरा माता नाम गरेको फेक फेसबुक आईडी बनाएर रोजगारीका विभिन्न प्रस्तावहरूसमेत प्रचार गरी अनलाइनबाटै फिजिकल फिटनेस जाँच्ने भन्दै नग्न भिडियाे बनाएर ब्ल्याकमेलिङ गरेको आरोप अधिकारीमाथि रहेकाे छ ।

पक्राउ परेका अधिकारीविरुद्ध विद्युतीय कारोबार ऐनअन्तर्गतको कसुरमा जिल्ला अदालत काठमाडौंबाट पाँच दिनको म्याद थप गरेर अनुसन्धान अघि बढाइएको ब्यूरोका प्रवक्ता तथा एसपी दीपकराज अवस्थीले जानकारी दिएका छन् ।