ललितपुरकाे गाेदावरीस्थित आनन्द वनमा डढेलाे सल्किँदा कुष्ठराेग अस्पताल जाेखिममा
काठमाडाैं, बैशाख १८ ।
ललितपुरको गोदावरी नगरपालिका-६ स्थित आनन्द वनमा डढेलो सल्किँदा त्यहाँ अवस्थित रहेकाे कुष्ठरोग अस्पताल जोखिममा परेको छ ।
डढेलाे नियन्त्रणका लागि नेपाली सेना, सशस्त्र प्रहरी, नेपाल प्रहरी, अग्नि नियन्त्रकसहितको टोली परिचालन भने गरिएको छ ।
लेलेतर्फको जंगलको डढेलो फैलिँदै आनन्द वनसम्म पुगिसकेकाे छ । त्यहाँ रहेको आनन्द वन अस्पतालको करिब ७ सय मिटरनजिकै डढेलो आइपुगेको प्रहरीले जनाएको छ ।
आनन्द वन अस्पतालमा कुष्ठरोगीहरूको उपचार हुने गरेकाे छ । त्यहाँ हाल ९३ जना बिरामीहरू उपचाररत् रहेका छन् ।
डढेलो फैलिँदै अस्पतालको नजिक आएकाले सतर्कता अपनाइएको ललितपुर प्रहरी प्रवक्ता एसपी नरेशराज सुवेदीले जानकारी दिएका छन् । ‘डढेलो नियन्त्रणको प्रयास जारी रहेकाे छ, आवश्यक परेकाे खण्डमा बिरामीहरूलाई स्थानान्तरण गर्नेसम्मको तयारी गरिएको छ,’ उनले भने ।
प्रतिक्रिया