नेपालको राजकीय भ्रमणमा आएका कतारका अमिर शीतल निवासमा
काठमाडाैं, बैशाख ११ ।
नेपालका लागि दुई दिने राजकीय भ्रमणमा आएका कतारका अमिर शेख तमिम बिन हमाद अल थानी राष्ट्रपतिको कार्यालय भवन शीतल निवासमा पुगेका छन् । त्रिभुवन अन्तर्राष्ट्रिय विमानस्थलबाट सिधैँ उनी शीतल निवास पुगेका हुन् ।
आज मंगलबार विमानस्थलमा उत्रिएलगत्तै राजा थानीलाई लिएर राष्ट्रपति रामचन्द्र पौडेल शीतल निवास पुगेका हुन् ।
राष्ट्रपति रामचन्द्र पौडेल र कतारका अमिर शेख तमिम बिन हमाद अल थानीबीच राष्ट्रपति कार्यालय शीतल निवासमा भेटवार्ता सुरु भएको छ । अपराह्न कतारका अमिर राष्ट्रपति निवास शीतल निवास पुग्दा राष्ट्रपति पौडेलले उनलाई स्वागत गरेका थिए ।
शीतल निवासको गण्डकी हलमा सुरु भएको भेटवार्तामा उपप्रधानमन्त्री एवं परराष्ट्रमन्त्री नारायणकाजी श्रेष्ठ प्रकाश, सवारी व्यवस्थापनको जिम्मेवारीमा रहेका ऊर्जा, जलश्राेत तथा सिँचाईंमन्त्री शक्तिबहादुर बस्तेतलगायत विशिष्ट पदाधिकारीहरू संलग्न रहेका छन् ।
उनीहरूबीच द्विपक्षीय हित र चासोसहित कूटनीतिक सम्बन्धका विषयमा छलफल हुने बताइएको छ ।
यसअघि, विमानस्थलको अतिविशिष्ट कक्षमा राष्ट्रपति पौडेल, उपराष्ट्रपति रामसहायप्रसाद यादव, प्रधानमन्त्री पुष्पकमल दाहाल ‘प्रचण्ड’लगायत विशिष्ट पदाधिकारीहरूले अमिर अल थानीलाई स्वागत गरेका थिए ।
अमिर थानीको सम्मानमा राष्ट्रपति पौडेलले आजै रात्रिभोजको आयोजना गर्ने कार्यक्रमसमेत रहेको छ । कतारका अमिर अल थानी र प्रधानमन्त्री दाहालबीच भोलि बुधबार द्विपक्षीय वार्ता हुने कार्यक्रम पनि तय गरिएको छ ।
त्यसपछि, राजा सोल्टी होटलमा जाने तालिका रहेको छ । होटलमा कतारका अमिरको सम्मानमा राष्ट्रपति पौडेलले मंगलबार रात्री भोजको आयोजना गर्दै छन् ।
प्रतिक्रिया