काठमाडाैं, जेठ २ ।
नेपाली क्रिकेट टीमका पूर्वकप्तान सन्दीप लामिछानेविरुद्ध दायर भएको जबरजस्ती करणीसम्बन्धी मुद्दाको बहस थप लम्बिएको छ । उच्च अदालत पाटनमा चलिरहेको बहस खाजा समय अगाडि नै सक्ने भनिएपछि बहस लम्बिएको हो ।

जाहेरीवालाका तर्फबाट धेरै कानून व्यावसायी भएका कारण उनीहरूको बहस लम्बिएको हो । जाहेरवालाका तर्फबाट मङ्गलवार आधा दिनदेखि बहस सुरु भएको थियो । सुरुमा सरकारी वकीलले ओपनिङ बहस गरेका थिए भने पछि सन्दीपको तर्फबाट बहस सुरु भएको थियो ।

सन्दीपका कानून व्यावसायीपछि सरकारी वकीलहरूले जवाफी बहस गरेका थिए । सरकारी वकीलको बहससँगै जाहेरवालाको तर्फबाट कानून व्यावसायीले बहस थालेका थिए । मङ्गलवार अबेरसम्म उनीहरूमध्ये केहीले बहस गरेका थिए ।

आज बुधबार बिहानदेखि उनीहरूकै बहस निरन्तर रूपमा चलिरहेको थियो । खाजा समयसम्म सक्ने गरी न्यायाधीशहरूले उनीहरूलाई डेढ घण्टा र सन्दीपका कानून व्यावसायीलाई जवाफका लागि १ घण्टाको समय निर्धारण गरेका थिए । तर उक्त समय अपुग भएको भनी जाहेरवालाका तर्फबाट समय माग भएपछि इजलासले केही समय उपलब्ध गराएको हो । न्यायाधीशद्धय सुदर्शनदेव भट्ट र अञ्जु उप्रेतीको इजलासमा बहस नसकिएपछि मुद्दा अन्तिम समयमा ‘हेर्दा हेर्दै ’ राखिएको थियो ।

जाहेरवालाहरूको बहस अन्तिम किनारातिर रहेको र उनीहरूको बहसपछि आफूहरूले बहस गर्ने सन्दीपका कानून व्यावसायीले जनाएका छन् । आफूहरूको धेरै कुरा नभएको तर इजलासमा बहसका क्रममा उठेको प्रश्नहरूलाई प्रष्ट पार्नुपर्ने देखिएको ती कानून व्यावसायीले बताए । सन्दीपको मुद्दामा आजै फैसला सुनाउने अदालतको तयारीसमेत रहेको छ ।

बहस चलिरहँदा सन्दीप पनि अदालतमै उपस्थित रहेका छन् । उनी इजलास र अदालत परिसरमा घुमिरहेका देखिन्थे । सुरुवाती बहसका क्रममा बिहान करिब आधा घण्टा उनी इजलासमै बसेर आफ्नो विपक्षमा भएको बहस सुनेका थिए ।