काठमाडाैं, जेठ २ ।
अन्ततः बलात्कार मुद्दामा सफाई पाइसकेपछि क्रिकेटर सन्दीप लामिछाने उच्च अदालत पाटनमा देखिएका छन् । आफ्नो तर्फबाट मुद्दा लडेका केही वकिलसहित उनी उच्च अदालत परिसरमा देखिए ।

पहेँलो हुडी लगाएर अदालत परिसरमा देखिएका उनी सफाई पाएसँगै केही खुसी देखिएका छन् । वकिलमाझ देखिएका उनले काँधमा राष्ट्रिय झण्डासमेत भिरेको तस्वीरमा देख्न सकिन्छ ।

जिल्ला अदालत काठमाडौंबाट बलात्कार मुद्दामा दोषी ठहर उनी उच्चबाट सफाई पाएसँगै क्रिकेटमा पुनरागमन गर्ने अवस्थामा आइपुगेका छन् ।

क्रिकेटर सन्दीप लामिछानेले आफूलाई धेरै तवरबाट फसाइएको बताएका छन् । उच्च अदालत पाटनले सफाई दिएपछि संक्षिप्त प्रतिक्रिया दिँदै उनले समर्थकहरूप्रति आभार व्यक्त गरे ।

आफूले सुरुदेखि निर्दोष रहेको बताउँदै आए तापनि विगत साढे १ वर्षदेखि विभिन्न तवरले फसाएको बताए । ‘सुरुदेखि म निर्दोष छु भनिरहेँ । साढे १ वर्षभन्दा माथि भयो, मलाई धेरै तरिकाले फसाइएको थियो । अपराधी करार गरिएको थियो । अन्त्यमा यहाँसम्म आइपुगेको छु,’ उनले भने ।

उनले यसअघि जिल्ला अदालत काठमाडौंको फैसलालाई पनि सम्मान गरेको र उच्च अदालत पाटनको फैसलालाई पनि सम्मान गर्ने बताए ।

उनले काँधमा नेपालको झण्डा राख्दै नेपाली क्रिकेटलाई झन् माथि पुर्‍याउने प्रतिबद्धतासमेत गरे । ‘नेपाली क्रिकेटलाई जहाँ पुर्‍याएको थिएँ, त्यसभन्दा पनि माथि पुर्‍याउँछु,’ उनले भने ।

सन्दीपका कानून व्यावसायी सरोजराज घिमिरेले सन्दीप लामिछानेलाई कप्तानीसहितको जिम्मेवारी दिनुपर्ने बताएका थिए ।