जनकपुर, श्रावण २० ।
प्रधानमन्त्री एवं नेपाली कांगे्रसका सभापति शेरबहादुर देउवाले राष्ट्रिय जनता पार्टी (राजपा) असोज २ मा स्थानीय चुनावमा सहभागी हुने विश्वास व्यक्त गरेका छन् ।

जनकपुरधाममा आज पत्रकारहरूसँग कुराकानी गर्दै उनले मधेशका मुद्दाको सम्बोधन क्रमशः हुँदै गएका कारण राजपालाई चुनावमा जान वातावरण बनेको बताए ।

एक प्रश्नको जवाफमा उनेले नेपाली कांगे्रस संविधान संशोधन विधेयकलाई पारित गराउन अग्रसर रहेको बताए । प्रधानमन्त्री देउवाले संविधान संशोधनमा नेकपा एमाले र राष्ट्रिय प्रजातन्त्र पार्टी बाधक देखिएको प्रसंग पनि उल्लेख गरे ।

उनले एशियाली विकास बैंकको आयोजनाअन्तर्गत जनकपुरमा भइरहेको सडक र ढल निर्माण कार्यमा सहयोग गर्न जनकपुरवासीसँग आग्रह गरे ।

निर्वाचनमा नेकपा माओवादी केन्द्रलगायत इच्छुक दलसँग कांगे्रस तालमेल गर्ने पक्षमा रहेको पनि उनले स्पष्ट पारेका छन् ।