काठमाडाैं, जेठ ३१ ।
काठमाडौंको चन्द्रागिरी नगरपालिका-२ नागढुङ्गानजिकै घुमाउने पसल अगाडि दुर्घटना भएको माइक्रो बसका घाइतेको बलम्बुस्थित सशस्त्र प्रहरी बल नेपाल अस्पतालमा उपचार भइरहेको छ ।

काठमाडौंबाट चितवनतर्फ जाँदै गरेको बा. ३ ख ८६२९ नम्बरको माइक्रो बस अनियन्त्रित भई आज शनिबार अपराह्न सडकबाट करिब ८० मिटर तल खसेको थियो । उक्त माइक्रो बसमा चालक तथा सहचालकसहित २० जना सवार रहेका थिए ।

सो घटनाबारे जानकारी पाउनासाथ सशस्त्र प्रहरी बल नेपाल नं. १८ नीलबाराही गण काठमाडौंबाट सशस्त्र प्रहरी निरीक्षक बिर्खबहादुर शाहीको कमान्डमा खटिएको सुरक्षा फौजले उनीहरूको उद्धार गरेको सशस्त्र प्रहरीका सहप्रवक्ता शैलेन्द्र थापाले जानकारी दिए ।

घाइतेमध्ये दुई जनाको अवस्था भने गम्भीर रहेको सशस्त्र प्रहरीले जनाएको छ । दुर्घटनामा चार बालबालिका, पाँच महिला र ११ पुरुष घाइते भएका छन् ।