ललितपुरकाे माेबिल राखिएकाे टहराेमा आगलागी हुँदा घाइते भएका दुई बालिकाकाे मृत्यु
काठमाडाैं, बैशाख २४ ।
ललितपुर महानगरपालिकाको ग्वार्कोस्थित एक टहराेमा भएको आगलागीमा परी घाइते भएका दुई जना बालिकाको मृत्यु भएको छ । उपचारको क्रममा उनीहरूको मृत्यु भएको ललितपुर प्रहरी प्रमुख एसएसपी शेखर खनालले जानकारी दिएका छन् ।
उनकाअनुसार आगलागीबाट घाइते भएकी ८ वर्षीया प्रिया गिरी र ३ वर्षीया एलिसा गिरीको मृत्यु भएको हो । आगलागीबाट एकै परिवारका पाँच जना घाइते भएका हुन् ।
आगलागीबाट ३५ वर्षीय सञ्जय गिरी र उनकी पत्नी ३२ वर्षीया रूपा गिरी गम्भीर घाइते भएका छन् । उनीहरूको किस्ट अस्पतालको आईसीयूमा उपचार भइरहेको छ । अर्का घाइते १५ वर्षीय नित गिरीको अवस्था भने सामान्य रहेको प्रहरीले जानकारी दिएको छ ।
ललितपुर महानगरपालिका वडा नम्बर-१७ स्थित एक टहरोमा आइतबार आगलागी भएको थियाे । मोबिल स्टोर भएको उक्त टहरोमा आगलागी हुँदा तीन जना बालबालिकासहित पाँच जना घाइते भएका थिए ।
प्रतिक्रिया