काठमाडाैं, जेठ ६ ।
अखिल नेपाल फुटबल संघ एन्फाका तत्कालीन महासचिव एवं वर्तमान प्रमुख कार्यकारी अधिकृत (सीईओ) इन्द्रमान तुलाधरविरुद्ध अख्तियार दुरूपयोग अनुसन्धान आयोगमा उजुरी दर्ता भएको छ ।

प्राप्त जानकारीअनुसार उजुरी विवरणमा उजुरीकर्ताले ‘भ्रष्टाचार र गैरकानूनी सम्पत्ति आर्जनअन्तर्गत कारबाही’ गर्न माग गरेका छन् ।

तत्कालीन महासचिव एवं वर्तमान प्रमुख कार्यकारी अधिकृत (सीईओ) तुलाधरले प्रयोग गर्दै आएको एन्फाको नाममा दर्ता भएको रातो विद्युतीय कारमा आवश्यक सीडी प्लेयर, ब्याक क्यामरा, स्टेरिङ्ग कभर, हिलो म्याट र सिट कभर जाली खरिद गर्ने क्रममा तत्कालीन एन्फा अध्यक्षसमेतलाई गुमराहमा पारेर भ्रष्टाचार गरेको र एउटै नम्बरको बिलमासमेत किर्ते गरेको उजुरीमा उल्लेख गरिएकाे छ ।

‘सामान्य विषयमासमेत भ्रष्टाचार गर्न उद्यत देखिएकोले निज लामो समयसम्म एन्फामा विभिन्न पदमा रही कार्य गरेको देखिँदा निजको सम्पत्तिसमेत जाँचबुझ गर्नुपर्ने देखिन्छ’, उजुरीमा भनिएकाे छ ।

सीईओ तुलाधरले विगतमा पनि राष्ट्रिय खेलकुद परिषद्अन्तर्गत तेक्वान्दोको सहायक प्रशिक्षक हुँदा एन्फाको सीईओसमेत नियुक्त भई दोहोरो तलब भत्ता बुझेको भन्दै सोसमेत छानबिन गरी आवश्यक कारबाहीका लागि अनुरोध गरिएको छ ।

निवेदनमा तुलाधारको सीईओको नियुक्तिलाई गैरकानूनी दाबी गरिएको छ । उजुरीमा भनिएको छ, ‘एन्फाको कर्मचारी सेवा सर्तसम्बन्धी नियमावली २०७७ मा स्पष्ट व्यवस्था हुँदाहुँदै सुरुको प्रक्रिया पूरा नगरी संघको विधानको धारा ३८ को (छ) लाई अपव्याख्या गरी स्वार्थ बाँझिने गरी संकटा क्लबको अध्यक्ष श्री इन्द्रमान तुलाधरले गैकानूनी रूपमा नियुक्ति लिई १,०५,००० (एक लाख पाँच हजार) तलब भत्ता लिँदै आएकोसमेत जानकारी गराउँदछौँ ।’