एजेन्सी, जेठ ६ ।
ताइवानको संसद्मा विवादास्पद विधेयकलाई लिएर सत्तारुढ र विपक्षी सांसद्हरूबीच हात हालाहाल भएको छ । दुई पक्षबीचको भनाभन झडपमा बद्लिएको थियो । सांसद्हरूले एक अर्कालाई मुक्का हानाहान गरेका थिए भने पोडियममा उफ्रिएर संसद्को कारबाही अवरुद्ध गरेका थिए । केही सांसद्हरूले भने फाइल खोसेर सदन बाहिर लगेका थिए ।

झडपका क्रममा घाइते भएका पाँच जना सांसद्लाई अस्पताल भर्नासमेत गर्नु परेको थियो । घाइते हुनेमा डेमोक्रेटिक प्रोग्रेसिभ पार्टी (डीपीपी) र कुओमिन्ताङ (केएमटी) दुबैका प्रमुख व्यक्तिहरू थिए । डीपीपी सांसद् र विपक्षी केएमटी र टीपीपी पार्टीका सांसद्हरूबीच झडप केही घण्टासम्म चलेको थियो ।

ताइवानका नयाँ राष्ट्रपति चिङ तेहको शपथ ग्रहण नजिकिँदै गर्दा संसद्मा यस्तो घटना भएको हो । चिङ तेहको शपथ ग्रहण सोमबार मे २० मा हुँदैछ । ताइवान संसद्मा सरकारको काम कारबाहीमाथि नजर राख्ने विपक्षी सांसद्लाई बढी अधिकार हुने एउटा विधेयक पेश गरिएको थियो ।

यस बाहेक संसद्मा गलत बयान दिने सरकारी अधिकारीहरूमाथि फौजदारी अभियोग दर्ता हुने व्यवस्था पनि सो विधेयकमा थियो । यही विधेयकमाथि मतदान हुनुअघि सत्तारुढ र विपक्षी दलका सांसदबीच झडप भएको थियो ।

बहुमत भएकोले विपक्षी दल केएमटीले संसद्मा आफ्ना सांसद्हरूलाई बढी शक्ति दिलाउन खोजिरहेको छ । विपक्षी दलका सदस्यहरूले जबरजस्ती यो विधेयक संसद्मा पास गराउन खोजेको र यो संविधानको उल्लङ्घन भएको आरोप लाइको पार्टी डीपीपीले लगाएको छ ।