काठमाडाैं, भाद्र ३ ।
ललितपुर महानगरपालिकाको सानेपामा एक महिलामाथि सामूहिक बलात्कारको प्रयासकाे घटना सार्वजनिक भएको छ । बलात्कार प्रयास गरेको अभियाेगमा जिल्ला प्रहरी परिसर ललितपुरमा जबरजस्ती करणी उद्योगमा जाहेरी दर्तासमेत भएको छ ।

घटना असार ३१ गतेकाे हो । रौतहट घर भएकी एक महिला सानेपास्थित श्रीमानको डेरा गरी बसेकाे कोठामा साँझ ७ बजेतिर आइपुगेकी थिइन् । पीडित महिलाकाअनुसार त्यतिबेला उक्त कोठामा उनका देवर मात्रै थिए । श्रीमान् भने काममा गएका थिए । त्यसपछि अर्का दुई व्यक्ति प्रवेश गरेर आफूमाथि बलात्कारको प्रयास भएको ती महिलाकाे दाबी थियाे । बलात्कारकाे प्रयास गर्नेलाई आफ्ना देवरले समेत सहयोग गरेको ती महिलाले आरोप लगाएका छन् ।

पीडित महिलाका देवरका साथै रौतहटको विश्रामपुर घर भएका अन्दाजी ३२ वर्षीय सचिन यादव, रौतहटकै परोहा नगरपालिका-४ घर भएका अन्दाजी २२ वर्षका बिपुल यादवसमेत गरी तीन जना व्यक्तिहरूले आफूमाथि बलात्कारको प्रयास गरेको पीडित महिलाको दाबी गरेकी छन् ।

बलात्कारको प्रयास भएकाे बेला प्रतिकार गर्दा शरीरका विभिन्न भागमा चोटपटकसमेत लागेको उनले बताएकी छन् । घटना भएको एक महिना बितिसक्दा समेत प्रहरीले आरोपितहरूलाई पक्राउ नगरेको उनको गुनासो छ ।

तर, घटनाबारे अनुसन्धान भइरहेको जिल्ला प्रहरी परिसर ललितपुरका एसएसपी शेखर खनालले बताए । पीडितको मेडिकलसमेत जाँच गरेर घटना अघि बढाइएको जनाएकाे छ ।

श्रावण ६ गते नै जबरजस्ती करणी उद्योगको कसुरमा जाहेरी दर्ता गरेर कानूनी प्रक्रिया अघि बढाइएको उनले बताए । आरोपितहरू हाल फरार भएकाले तीब्र रूपमा खोजी कार्य गर्ने क्रम जारी रहेको प्रहरीले जनाएको छ ।