काठमाडाैं, श्रावण २२ ।
औद्योगिक घराना आरएमसी ग्रुपका संस्थापक अध्यक्ष श्रवणकुमार अग्रवालको ७७ वर्षको उमेरमा निधन भएको छ ।

मारवाडी सेवा समितिका पूर्वअध्यक्षसमेत रहेका अग्रवाल दुई पटक संविधान सभाको सदस्य पनि भएका अग्रवालको सोमबार सानेपास्थित आफ्नै निवासमा निधन भएको हो ।

उनी नेपाल उद्योग परिसंघका अध्यक्ष राजेशकुमार अग्रवालका पिता हुन् ।

नेपाल उद्योग परिसंघकाअनुसार अग्रवाल ५८ वर्षदेखि विभिन्न उद्योग व्यावसायमा क्रियाशील थिए ।

सन् १९९३ मा राजेश मेटल क्राफ्ट उद्योग स्थापना गरी उद्योगमा सक्रिय अग्रवालको अगुवाइमै आरएमसी सिमेन्ट, पाल्पा सिमेन्ट, आरएमसी फुड्स उद्योग सञ्चालनमा छन् ।

गौशालालगायत अन्य मठमन्दिर निर्माणमा योगदान गरेका उनले संस्थागत एवं व्यक्तिगत रूपमा सामाजिक क्षेत्रमा समेत योगदान गरेका थिए ।

स्वर्गीय अग्रवालका श्रीमती दुलारी, एक छोरी बबिता, दुई छोरा राजेश र विष्णु छन् ।

अग्रवालको पार्थिव शरीरलाई आज मंगलबार बिहान साढे ११ बजे पशुपति आर्यघाटमा अन्तिम दाह संस्कार गरिने पारिवारिक श्रोतले जनाएको छ ।