काठमाडाैं, श्रावण २४ ।
सरकारले डेँगु संक्रमणबाट भर्ना भएका बिरामीको सरकारी अस्पतालहरूमा निःशुल्क उपचार गर्ने भएको छ ।

स्वास्थ्य तथा जनसङ्ख्या मन्त्री प्रदीप पौडेले मन्त्रालय तथा अन्तर्गतका विभाग, सङ्घीय अस्पताल महाशाखा केन्द्र, स्वास्थ्य प्रतिष्ठान तथा मेडिकल कलेजका प्रमुखसँग छलफल गरेर यस्तो निर्णय गरेका हुन् ।

साथै उनले आफ्नो कार्यालयमा सतर्कता र सचेतनाका कार्यक्रमहरू सञ्चालन गर्ने, डेँगु डेस्क स्थापना गरी फोकल पर्सन तोक्ने, बिरामीको उपचार व्यवस्थापन गर्ने निर्णयसमेत गरेका छन् ।

स्वास्थ्य क्षेत्रको एकल प्रयासले मात्र डेँगु नियन्त्रणका कार्यलाई प्रभावकारी बनाउन असम्भव भएकाले डेँगुको रोकथाम नियन्त्रणका लागि व्यापक समुदाय परिचालन र बहुक्षेत्रीय संलग्नता आवश्यक रहेको मन्त्रालयका प्रवक्ता डा. प्रकाश बुढाथोकीले बताए ।

डेँगुबाट हुन सक्ने क्षतिलाई कम गर्न डेँगु संक्रमण रोकथाम र नियन्त्रण गर्न सबैको प्रयासले मात्र सकिने भएकाले सर्वसाधारण, निजी क्षेत्र र सरोकारवाला सबैलाई सहभागिता, सहजीकरण एवं समन्वय गरी दिनुहुन मन्त्रालयले अनुरोध गरेको छ ।

अघिल्लो वर्षको तुलनामा यस वर्ष बिरामीको सङ्ख्यामा वृद्धि नभए तापनि जोखिम कायम रहेकाले सचेत रहन मन्त्रालयको आग्रह रहेकाे छ ।

पुसदेखि नेपालमा ७३ जिल्लाबाट २ हजार ३ सय ६५ जनामा डेँगु संक्रमण पुष्टि भएको छ । जसमध्ये तनहुँका ५० वर्षीय एक व्यक्तिको मृत्युसमेत भएको छ । मृतक व्यक्ति दीर्घ रोगी भएको मन्त्रालयले उल्लेख गरेको छ ।