काठमाडाैं, श्रावण २७ ।
गायक प्रकाश तिमिल्सिनाको निधन भएको छ । पारिवारिक स्रोतकाअनुसार शनिबार साँझ उनी ललितपुरको भैँसेपाटीस्थित डेरामा अचेत अवस्थामा फेला परेका थिए । त्यसपछि तत्काल पाटन अस्पताल पुर्‍याएका उनलाई चिकित्सकले मृत घोषित गरेका थिए ।

तिमिल्सिनाको शवलाई आज आइतबार बिहान ८ बजे संगीत तथा नाट्य प्रज्ञा प्रतिष्ठान नक्साल भगवती बहालमा अन्तिम श्रृद्धाञ्जलीका लागि राखिने संगितकार चेतन सापकोटाले जानकारी दिए । तिमिल्सिनाको अन्तिम संस्कार आजै पशुपति आर्यघाटमा गरिने जनाएको छ । तिमिल्सिना गायन प्रतियोगिता ‘नेपाली तारा’मार्फत् संगीत क्षेत्रमा उदाएका थिए ।

२०४५ सालको भूकम्पपछि आएको बाढीका कारण उनले दुबै आँखाको ज्योती गुमाएका थिए । उनी सप्तकोशीमा आएको बाढीले सुनसरीको आफ्नो घरसँगै बुबा आमासमेत गुमाएका प्रकाशलाई माछा मार्ने क्रममा माझीले उद्दार गरेका थिए ।

भारतको कोलकातामा सम्पन्न साउथ एशियन स्टारमा सहभागी भएपछि गायक तिमिल्सिना चर्चामा आएका हुन् । कोलकाताको उक्त प्रतियोगितामा तिमिल्सिनाले बेस्ट इङ्लिश प्रोनाउन्सेसनको अवार्ड पनि जितेका थिए । भैँसेपाटीमा बस्दै आएका तिमिल्सिनाका ‘प्रिय तिम्रो सिउँदोमा सिन्दूर भर्न देऊ’, ‘नमान लाज यसरी’, ‘नआए नि हुन्थ्यो’ लगायतका दर्जनौँ गीत चर्चित रहेका छन् ।

तिमिल्सिना संगीतलाई आफ्नो जीवनको सर्वश्व ठान्थे । विभिन्न रेडियो र टेलिभिजन कार्यक्रमहरू तथा दुई दर्जनभन्दा बढी देशमा साङ्गीतिक कार्यक्रममा सहभागी भएर उनले आफूलाई नेपाली संगीतमा स्थापित गरेका थिए ।