काठमाडाैं, श्रावण ३१ ।
भक्तपुरको गट्ठाघरमा आज बिहीबार दिउँसो भएको सवारी दुर्घटनामा ज्यान जाने महिलाको पहिचान फरक परेपछि प्रहरीले पुनः सनाखतको प्रक्रिया अघि बढाइएकाे छ ।

यसअघि, दोलखाको मेलुङ गाउँपालिका-४ का शम्भु नेपालीले प्रहरी कार्यालयमा पुगेर आफ्नी बहिनी भएको जानकारी दिएपछि प्रहरीले त्यही विवरण सार्वजनिक गरेको थियो । तर उनले गलत जानकारी दिएको खुलेको छ ।

आफ्नो मृत्यु भएको समाचार थाहा पाएपछि ती युवती प्रहरीको सम्पर्कमा आएकी छन् । प्रहरीले मृतकको पहिचान गर्ने प्रयास गरिरहेको छ ।

दुर्घटनामा परेको स्कुटरको सवारी दर्ता किताब (ब्ल्युबुक) ओखलढुङ्गाका उत्तम सिलवालको नाममा रहेको पाइएको छ । यस्तै दुर्घटनास्थलमा रमेश न्यौपानेको नाममा ट्राफिकले काटेको चिट पनि फेला परेको छ ।

बिहीबार दिउँसो करिब सवा २ बजेतिर गट्ठाघरमा ना. ६ ख २१७३ नम्बरको ट्रकले बा. ३९ प ८९४४ नम्बरको स्कुटरलाई ठक्कर दिँदा स्कुटर चालकको घटनास्थलमै मृत्यु भएको थियाे । ट्रकले ट्राफिक चेकिङ्गमा रोकिराखेको स्कुटरलाई निकै परसम्म घिसारेको थियो र मृतकको शरीर क्षतविक्षत भएको थियो ।

घटनापश्चात् प्रहरीले केही सेल अश्रु ग्याँससमेत प्रहार गरी भीडलाई नियन्त्रणमा लिइएकाे थियाे ।