काठमाडाैं, भाद्र ६ ।
चाडपर्वमा प्रशासनको अनुमति बिना नाचगान गर्न जिल्ला प्रहरी कार्यालय रौतहटले रोक लगाएको छ ।

जिल्ला प्रहरी कार्यालय रौतहटको प्रवक्ता तथा सूचना अधिकारी प्रहरी नायब उपरीक्षक एलिजा गिरीले आज बिहीबार प्रेस नोट जारी गर्दै यस्तो जानकारी गराएकी हुन् ।

अधिकार प्राप्त अधिकारी/निकायको अनुमति बिना विभिन्न चाडपर्वको नाममा गाउँ-गाउँमा दिन र रातको समयमा अश्लीलता झल्किने किसिमका भोजपुरी गीत गाउने, लवण्डा नचाउने, आर्केस्टा नचाउने, मनोरञ्जनको नाममा जुवा जेल्ने/खेलाउने जस्ता कारण विभिन्न ठाउँमा एक आपसमा झै-झगडा तथा कुटपिट गर्ने, ढुङ्गामुढा गर्ने, विभिन्न मानिसको धन सम्पत्ति क्षति हुन गएको कारण यस प्रकारको निर्णय लिइएको उनको भनाई छ ।

धार्मिक, साँस्कृतिक, राजनैतिक आदि कुनै किसिमको नाचगान हुने वा भिडभाडजस्ता कार्यक्रम गर्दा अनिवार्य रूपमा कार्यक्रम गर्ने आयोजक पक्षले कार्यक्रम सञ्चालक समिति गठन गरी के-कस्तो कार्यक्रम गर्ने, कुन समयमा गर्ने, कुन स्थानमा गर्ने, सहभागी सङ्ख्या कति गर्ने लगायतका विषयवस्तु खुलाइ जिल्ला प्रशासन कार्यालय र सम्बन्धित निकायबाट अनुमति लिई सम्बन्धित निकायबाट तोकिएअनुसार कार्यक्रम गर्न र गराउन जिल्ला प्रहरी कार्यालय रौतहटले सूचित गराएको छ ।

तोकिएको भन्दा फरक किसिमको कार्यक्रम वा गतिविधि गरेको पाइएमा सोको जिम्मेवार आयोजक पक्ष नै हुने चेतावनी पनि प्रहरी नायब उपरीक्षक गिरीद्वारा जारी प्रेस नोटमा उल्लेख गरिएकाे छ ।