काठमाडौं, असार १२ ।
नेकपा (एमाले) का अध्यक्ष केपी शर्मा ओलीले इस्लाम धर्मावलम्बीहरूको पवित्र महिना रमजानको अन्त्यमा मनाइने ईद उल फित्रको अवसरमा नेपाल र नेपाल बाहिर रहनुभएका सम्पूर्ण मुस्लिम समुदायका दिदीबहिनी दाजुभाईमा शुभकामना दिँदै सामाजिक सहिष्णुता, जिम्मेवारीबोध र राष्ट्रिय एकता आजको आवश्यकता भएकोमा जोड दिएका छन् ।

‘हाम्रो मुलुक विविध भाषा, संस्कृति, धर्म, समुदाय र भूगोल जस्ता कुराहरूले विश्वमै विशिष्ट अवस्थामा छ । सदिऔँदेखि यी विशेषतायुक्त जनताको एकतालाई खल्बल्याउन विभिन्न कोणबाट भइरहेका प्रयत्नप्रति हामी सबै विशेष संवेदनशील हुन आवश्यक छ,’ उनले भने ।

अध्यक्ष ओलीले एक प्रेस विज्ञप्ति जारी गर्नुभएको शुभकामना सन्देशमा भनिएको छ, ‘हाम्रो सामाजिक सहिष्णुता, मित्रता र सहकार्यले नै हाम्रो मुलुकलाई सबैको साझा फूलबारी बनाएको छ । यस विशिष्टतालाई अझ उन्नत बनाउन इस्लाम धर्मावलम्बीहरूको ईदका अवसरमा आपसमा बाँडिने शुभकामना आदान प्रदानले भूमिका निर्वाह गर्ने मैले अपेक्षा गरेको छु ।’