काठमाडाैं, असाेज २० ।
चर्चित हाँस्य कलाकार हरिवंश आचार्य र उनकी श्रीमती रमिला आचार्यलाई पनि कोरोना संक्रमण पुष्टि भएको छ । आज हाँस्य कलाकार हरिवंश आचार्य आफैँले आफ्नो फेसबुक पेजमार्फत् आफू र आफ्नो श्रीमतीलाई कोरोना संक्रमण भएको जानकारी गराएका हुन् ।

उनले सामान्य लक्षण देखिएपछि पीसीआर गर्दा पोजेटिभ रिपोर्ट आएको बताए । उनले पेजमा लेखेकाे छ, ‘सामान्य लक्षण देखिएकोले हिजो मेरो र मेरी श्रीमती रमिलाको पीसीआर टेष्ट गरेका थियौँ । हामी दुबै जनाको कोरोना संक्रमण पुष्टि भएको रिपोर्ट आज आयो ।’

कलाकार आचार्यले आफूहरूको स्वास्थ्य अवस्था सामान्य रहेको बताएका छन् । त्यस्तै, आफूहरूको सम्पर्कमा आएका सम्पूर्णलाई पनि होम आइसोलेसनमा बसेर निर्धारित समयमा परीक्षण गराउन आग्रह पनि गरेका छन् ।

उनले भने, ‘यहाँहरूको माया, आशिर्बाद र शुभेच्छाको कारण हामीले छिट्टै कोरोना संक्रमणलाई जित्ने छौँ । कोरोना संक्रमण ब्यापक रूपमा फैलिएको हुँदा यहाँहरू सबैले जनस्वास्थ्यका मापदण्ड अनिवार्य रूपमा अबलम्बन गर्नुहुन अनुरोध गर्दछौँ ।’