काठमाडाैं, कार्तिक १ ।
राष्ट्रिय स्वतन्त्र पार्टी (रास्वपा) का सभापति रवि लामिछानेविरुद्ध प्रहरीले सहकारी ठगीसँगै संगठित अपराधको कसुरमा पनि अनुसन्धान गर्न अदालतबाट अनुमति लिएको खुलासा भएको छ ।

जिल्ला प्रहरी कार्यालय, कास्कीले केन्द्रीय अनुसन्धान ब्यूरो (सीआईबी) सहितका प्रहरी निकायलाई पठाएको पत्रमा ‘ठगी तथा संगठित अपराधसम्बन्धी मुद्दा’मा अनुसन्धान गर्न लामिछानेलाई पक्राउ गरेर पठाइदिन आग्रह गरिएको प्रहरी श्राेतले जनाएको छ ।

यसैबीच, सभापति रवि लामिछानेलाई स्थलमार्गबाट पोखरा लगिने भएको छ ।

प्रहरीसँग समन्वय भइरहेको बताउँदै उनले आफू सडकमार्गबाट पोखरा जाने धारणा राखेको पार्टीका कार्यबाहक प्रवक्ता मनिष झाले जानकारी दिए ।

यसबारे सुरक्षा अधिकारीहरूसँग कुराकानी भइसकेको झाको भनाई छ । झाकाअनुसार, त्यसअघि लामिछानेले पार्टी कार्यालयमा सञ्चारकर्मी र समर्थकहरू माझ केही कुराहरू राखेका छन् ।