काठमाडाैं, कार्तिक ७ ।
काठमाडौं महानगरपालिकाको कोटेश्वरबाट एक महिला अपहरणमा परेकी छन् ।

प्रहरी श्राेतकाअनुसार उनलाई अपहरण गरेर बन्धक बनाइएको हो । उनको रिहाइका लागि १६ लाख रुपैयाँ फिरौती माग गरिएको प्रहरी श्राेतले जानकारी गराएको छ ।

पीडित महिलाका आफन्तले आफ्नो मान्छेलाई अपहरण गरेर एउटा समूहले ललितपुरतिर लगेर बन्धक बनाएको प्रहरीलाई जानकारी गराएका छन् ।

उक्त जानकारी प्राप्त भएपछि खोजतलास गरिरहेको काठमाडौं उपत्यका अपराध अनुसन्धान कार्यालयका प्रमुख एसएसपी सानुराम भट्टराईले बताएका छन् ।

‘महिलाका आफन्तले अपहरण गरेर फिरौती माग गरिरहेको भनेका छन् । तर, हामी अनुसन्धान गरिरहेका छौँ । त्यो विषय लेनदेनको पनि हुन सक्छ । आफ्नो पैसा उठाउनका लागि बल प्रयोग गरेको र पैसा तिरेर जा भनेको पनि हुनसक्छ’, भट्टराईले भनेका छन् ।

प्रहरीले अपहरणमा परेकी भनिएकी महिलाको परिचय भने गाेप्य नै राखिएकाे छ ।

महिलाको उद्धारका लागि प्रहरी परिचालन गरिसकेकाे र उपत्यका अपराध अनुसन्धान कार्यालयले घटनाबारे अनुसन्धान गरिरहेकाे जनाएकाे छ ।