काठमाडाैं, कार्तिक ९ ।
ललितपुर महानगरपालिकाकाे वडा नं.-१६ पाटनको दौबहालमा स्थानीय जात्रा, पहिरन, पहिचान र संस्कृतिलाई ऊजागर गर्नुका साथै स्थानीय उत्पादनलाई बजारीकरण गर्ने अभिप्रायका साथ रात्रिकालीन व्यापार मेला हुने भएको छ ।

वडा नं.-१६ कार्यालयले पत्रकार सम्मेलन गरी दिएको जानकारीअनुसार ललितपुर महानगरपालिकाको वडा नं.-१६ महिला समितिको आयोजनामा यही कार्तिक ११ र १२ गते आइतबार र साेमबार साँझ ४ बजेदेखि ९ बजेसम्म रात्रिकालीन व्यापार मेलाकाे आयाेजना गर्न लागिएको हो ।

वडा नं.-१६ का अध्यक्ष निर्मलरत्न शाक्यले पर्यटनको प्रचुर सम्भावना बोकेको शहरमा बसेका स्थानीयलाई आयआर्जनमा जोड्न यो प्रयास महत्त्वपूर्ण हुने बताएका छन् । “यो मेलामा हस्तकला महासङ्घ, पाटन पर्यटन विकास संस्थाको पनि सहयोग रहने विश्वास छ, महानगरपालिकाको दीर्घकालीन योजनालाई सहयोग पुर्‍याउने उद्देश्यअनुसार यो कदम चालिएको हो । महिलाले घर-घरमा उत्पादन गरेका हस्तकलालगायत सामग्री बिक्री गरेर आर्थिको पार्जन गर्न सक्ने अवसर मिल्ने छ”, उनले भने ।

अध्यक्ष शाक्यले यसबाट स्थानीय श्रम, शीप र क्षमताको बजारीकरण हुनुका साथै समुदायको आयआर्जनमा सहयोग पुग्ने विश्वास व्यक्त गर्दै मेलाका समयमा साङ्गीतिक कार्यक्रमसमेत गरिने उनले जानकारी गराए ।

मेलामा स्थानीय हस्तकलाका सामग्री, स्थानीय नेवारी खानाका परिकार समावेश हुने आयोजकले जनाएको छ । जात्रा, पहिरन, हाम्रो पहिचान र संस्कृतिलाई प्रचार-प्रसार गर्ने अभिप्रायले हुन लागेको यो कार्यक्रमलाई अझ परिस्कृत गरेर लैजाने अध्यक्ष शाक्यले बताए । आगामी वर्षदेखि मेलालाई व्यवस्थित बनाउन वृहत् रूपमा तालिका बनाएर सञ्चालन गरिने उनले जानकारी गराए ।

रात्रिकालीन व्यापार र बजारलाई प्रोत्साहन र प्रबर्द्धन गर्दै हस्तकलाको प्रबर्द्धन, स्थानीय उत्पादनको बजारीकरण र पर्यटनको विकास गर्ने उद्देश्यका साथ मेला आयोजना गर्न लागिएको मेला व्यवस्थापन समितिका संयोजक बबिता श्रेष्ठले जानकारी गराइन् ।

“स्थानीय व्यापार वृद्धि गरी महिलाको आयआर्जन वृद्धि गर्न सानो प्रयास हो, पाटनलाई २४ सै घण्टा जागृत गराउने उद्देश्यले यो क्षेत्रलाई उकास्न दीर्घकालीन योजनाअनुसार काम गर्ने लक्ष्यका साथ यो मेला आयाेजना गर्न लागिएको हो । नुनदेखि सुनसम्म पाइने व्यवस्था मिलाइनेछ, ८० वटा स्टलको व्यवस्था गरिनेछ, हरेक स्थलमा फरक-फरक सामान राख्ने व्यवस्था मिलाइनेछ, तिहारलाई चाहिने खाद्यान्नसहित अन्य सामग्री राख्नेछौँ”, उनले भने ।

ललितपुर महानगरपालिकाका प्रमुख चिरीबाबु महर्जनले ललितपुरलाई ‘स्मार्ट सिटी’ बनाउने अभियानभित्रै ‘पाटन डज नट स्लीप’ योजनालाई पनि समेट्ने र त्यसका लागि आवश्यक पूर्वाधारसहित विपद् व्यवस्थापनलगायत काम गरेर मात्र घोषणा गर्ने बताउँदै आएका छन् ।