काठमाडाैं, कार्तिक १० ।
देशभर पश्चिमी वायुका साथै बंगालको खाडीमा विकसित चक्रवात ‘दाना’को आंशिक प्रभाव नेपालमा समेत परेको छ । जल तथा मौसम विज्ञान विभागको मौसम पूर्वानुमान महाशाखाकाअनुसार अहिले कोशी प्रदेशको एक/दुई स्थानमा हल्का वर्षासमेत भइरहेको छ ।

कोशीमा आंशिकदेखि साधारणतया बदली र बाँकी प्रदेशमा आंशिक बदली रहेको छ । विभागकाअनुसार शुक्रबार राति कोशी प्रदेश र पहाडी भू-भागका एक/दुई स्थानमा मेघगर्जन र चट्याङ्गसहित हल्का वर्षाको सम्भावना छ भने बाँकी स्थानमा मौसम मुख्यतया सफा रहनेछ ।

आज शनिबार र भाेलि आइतबार पनि कोशी प्रदेश र पहाडी भू-भागका केही स्थान बाहेक मुख्यतया मौसम सफा रहने विभागले जनाएको छ । कोशी प्रदेशलगायत देशका पहाडी भू-भागका एक/दुई स्थानमा मेघगर्जन र चट्याङ्गसहित हल्का वर्षाको सम्भावना रहेकाले कृषि, स्वास्थ्य, पर्यटन, पर्वतारोहण, सडक तथा हवाई यातायातमा क्षणिक असर पर्न सक्ने हुनाले आवश्यक सतर्कता अपनाउन पनि विभागले अनुराेध गरेको छ ।