काठमाडौं, असार ४ ।
पहिलो चरणको स्थानीय तहको निर्वाचन सकिएको एक महिनापछि असार १४ गते हुने स्थानीय तहको निर्वाचनअन्तर्गत आजबाट दोश्रो चरणको निर्वाचनका लागि मनोनयन दर्ता प्रक्रिया सुरु भएको छ ।

निर्वाचन आयोगले मनोनयन दर्ता आज बिहान ८ बजेदेखि दिउँसो ४ बजेसम्मका लागि समयसीमा तोकिएको छ । यहीँ १४ गते हुने प्रदेश नम्बर १, ५ र ७ का एक महानगरपालिका, सात उपमहानगरपालिका र दुई सय १५ गाउँपालिकामा निर्वाचन हुनेछ । निर्वाचनमा ६४ लाख ३२ हजार सात सय ६५ मतदाता सहभागिता जनाउने छन् ।

त्यसैगरी, निर्वाचनका लागि चार हजार पाँच सय ८१ मतदानस्थलमा आठ हजार तीन सय ६४ मतदान केन्द्र तोकिएको छ । निर्वाचनमा सुरक्षाकर्मीबाहेक ६६ हजार नौ सय कर्मचारी खटिने आयोगले जनाएको छ ।

दोश्रो चरणको निर्वाचनमा पर्यवेक्षणका लागि आयोगले ४७ वटा संस्थाका करिब सात हजार ८९ जनालाई अनुमति प्रदान गरिएको छ ।