काठमाडौं, असार २७ ।
वीर अस्पताल टोमो थेरापी उपकरणको माध्यमबाट क्यान्सरका बिरामीको उपचार गर्ने तयारीमा जुटेको छ । ‘जुन सेलमा क्यान्सर देखिएको छ, त्यो सेललाई सेकी (रेडिएसनमार्फत) मार्न (किल) का लागि पछिल्लोपटक सो प्रविधि विकसित भएको हो ।

यो प्रविधिलाई वीर अस्पतालले पनि भित्र्याउँदै छ,’ अस्पतालका निर्देशक डा.भूपेन्द्र बस्नेतले भने । हाल सो सेवा निजी स्तरका केही अस्पतालमा मात्र उपलब्ध छ । यो सेवा लिन निजी अस्पतालमा दुई लाख रुपैयाँसम्म खर्चिनुपर्छ ।

निर्देशक डा.बस्नेतले भने, ‘टोमो थेरापी सेवा हामी पाँच हजारदेखि दश हजार रुपैयाँसम्ममा दिने तयारीमा छौँ, यसमा अति विपन्न, असहाय, गरिब बिरामीलाई भने निःशुल्क सेवा प्रदान गर्दैछौँ ।’

स्वास्थ्य मन्त्रालयले यहीँ आर्थिक वर्षमा उपकरण खरिद गरी सेवा सञ्चालनमा ल्याउन अस्पताललाई ४० करोड रुपैयाँ विनियोजन गरेको थियो अस्पताल र अमेरिकाको एक्युरे कम्पनीबीच उपकरण खरिदका लागि सम्झौतासमेत भइसकेको छ । अस्पताल उपकरण खरिद गर्न एलसी खोल्ने तयारीमा जुटेको छ ।

क्यान्सरका बिरामीको उपचारका लागि प्रयोग हुँदै आएका कोवाल्ट र लिन न्याक उपकरणभन्दा टोमो थेरापी सेवा अत्याधुनिक र नयाँ प्रविधि मानिन्छ । विगतमा वीर अस्पतालले कोवाल्ट प्रविधिबाट सेवा दिँदै आएकामा विगत केही वर्षदेखि उपकरण बिग्रिएर थन्किएको छ ।

हाल नयाँ र अन्यन्त्रबाट सिफारिस भई आएका गरी दैनिक ५० र ६० जना क्यान्सरका बिरामी वीर अस्पतालमा आउने गर्छन् । उपकरणका अभावमा त्यस्ता बिरामीको उपचारका लागि अस्पतालले अन्य अस्पतालमा सिफारिस गर्ने गर्छन् ।

नयाँ उपकरण जडान भइसकेपछि अस्पतालले दुई सिफ्टमा सेवा दिने जनाएको छ । निर्देशक डा.बस्नेतले भने, ‘क्यान्सर उपचारका लागि अस्पतालमा आए जति सबै बिरामीलाई सेवा दिन तयार छौँ ।’

गरिब, विपन्न, असहाय क्यान्सर रोगीका बिरामीलाई सस्तो, सुलभ तथा अति विपन्नलाई निःशुल्क सेवा दिने अस्पतालले जनाएको छ । नयाँ उपकरणसँगै वीर अस्पतालले क्यान्सर उपचारमा अन्तर्राष्ट्रिय सेवा दिन सक्षम छ भन्ने सन्देश सेवाको सुरुवातसँगै फैलिने अस्पतालले विश्वास लिएको छ ।

सबै विभागका लागि आवश्यक उपकरण आउँदै अस्पतालले आफू मातहतका विभागलाई आवश्यक पर्ने सबै उपकरण पूरा गर्ने भएको छ । हाल अस्पतालमा १४ विभाग छन् ।

‘विभागका मागअनुसार आवश्यक उपकरणको खरिद प्रक्रिया अगाडि बढिसकेको छ, कुनै उपकरण जडान भए, कुनै आउँदै छन्,’ निर्देशक डा. बस्नेतले भने । वीर अस्पतालमा नयाँ ग्यास्टोइन्डोस्कोपी उपकरण खरिदको प्रक्रियासमेत सुरु गरेको छ ।