काठमाडाैं, चैत २१ ।
नेपाल राष्ट्र बैंकबाट ‘क’ वर्गको इजाजत पत्र प्राप्त संस्था कुमारी बैंक लिमिटेडले आफ्नो वार्षिकोत्सव मनाएको छ । विभिन्न कार्यक्रमहरूको आयोजना गरी बैंंकले २४ औँ वार्षिकोत्सव मनाएको हो । वार्षिकोत्सवको अवसरमा बैंकले आफ्ना सम्पूर्ण ग्राहक तथा शुभचिन्तकहरूलाई कृतज्ञता ज्ञापन गर्दै आफ्नो सफलतामा महत्त्वपूर्ण भूमिका निर्वाह गर्ने ग्राहकहरूलाई आभार व्यक्त गरेको छ ।

साथै, बैंकले देशकै अग्रणी बैंक बन्ने परिकल्पना तथा योजना अनुरूप आफ्ना ग्राहकहरूलाई उत्कृष्ट बैंकिङ्ग सेवा तथा वित्तीय सुविधाहरू प्रवाह गर्नका लागि हरदम प्रतिबद्ध रहेको जनाएको छ ।

कुमारी बैंकको २४ औँ वार्षिकोत्सवको अवसरमा कर्मचारीलाई आ-आफ्नो परम्परा र संस्कृतिको महत्त्व दर्शाउन ‘परम्परागत भेषभुषा’ पहिरन गर्न प्रोत्साहित गरेको छ ।

कार्यक्रमले कर्मचारीहरूलाई आफ्नो परम्परागत पृष्ठभूमिको प्रतिनिधित्व गर्ने पोशाकमार्फत् साँस्कृतिक पहिचान तथा सम्बर्द्धन गर्न मद्दत पुर्‍याएको विश्वास लिएको छ । विविध साँस्कृतिक परम्परालाई अंगाल्दै, बैंकले आफ्नो कार्यक्षेत्रमा ‘विविधतामा एकता’लाई जोड दिएको छ ।

उक्त पहलमार्फत् बैंकले ‘सबैका लागि सधैँका लागि’ भन्ने मूल उद्देश्यभित्र रही आन्तरिक आबद्धताको भावनालाई बढावा दिन, संस्थागत संस्कृति र सामुदायिक कार्यलाई निरन्तरता दिएको छ ।

यसका साथै वार्षिकोत्सवको अवसरमा विभिन्न स्थानहरूबाट रक्तदान कार्यक्रम आयोजना भएको छ । यसले स्थानीयस्तरमा रक्त बैंकका आवश्यकता तथा जीवन बचाउने अभियानमा महत्त्वपूर्ण योगदान गर्ने लक्ष्य रहेको छ ।

विगत २४ वर्षदेखि निरन्तर बैंकिङ्ग सेवा दिँदै आएको कुमारी बैंकले आफ्ना देशभर रहेका ३ सय २ वटा शाखा सञ्जाल, ३ सय १६ वटा एटीएम मेसिन, ५० वटा एक्सटेन्सन काउण्टर तथा ५४ वटा शाखारहित बैंकिङ्ग इकाईहरूमार्फत् आफ्ना ग्राहकवर्गलाई अत्याधुनिक तथा प्रभावकारी सेवाहरू प्रदान गर्दै आइरहेको छ र आगामी दिनहरूमा पनि अझ सरल, शुलभ तथा उत्कृष्ट सेवाका निमित्त सहकार्यहरू गर्दै जानेसमेत बैंकले एक प्रेस विज्ञप्ति जारी गरी प्रतिबद्धता जनाएको छ ।