काठमाडाैं, चैत २१ ।
राजावादी आन्दोलनका क्रममा लुटपाट गरेको अभियाेगमा पक्राउ परेका राष्ट्रिय स्वतन्त्र पार्टी (रास्वपा) खोटाङका पूर्वसंयोजक डा. राजकुमार राईलाई थप ६ दिन हिरासतमा राखेर अनुसन्धान गर्न जिल्ला अदालत काठमाडौंले अनुमति दिएको छ ।

उनी चैत १५ गते तिनकुनेमा भएको राजावादी आन्दोलनमा अराजक गतिविधिमा संलग्न रहेको आरोपमा पक्राउ परेका थिए । उनलाई दोश्राे पटक म्याद थपका लागि काठमाडौं जिल्ला अदालत उपस्थित गराइएकोमा अदालतले थप ६ दिन हिरासतमा राख्न अनुमति दिएको हो ।

डा. राई पहिले रास्वपा खोटाङका संयोजकसमेत थिए । पार्टीको जिल्ला नेतृत्व निर्वाचनमार्फत् गएको पुसको मध्यमा हेरफेर भएको थियो । यो निर्वाचनमा जिल्ला सभापतिका लागि चुनाव लडेका राईले चुनाव हारेका थिए । चुनाव हारेपछि उनी पार्टीमा निष्क्रिय रहेको रास्वपाले जनाएको छ ।