काठमाडौं, फागुन १५ ।
नेपाली क्रिकेटका प्रशिक्षक रहेका राजु बस्न्यात दक्षिण कोरियाको राष्ट्रिय टोलीको मुख्य प्रशिक्षकमा नियुक्त भएका छन् । दक्षिण कोरियाले प्रशिक्षक बस्न्यातलाई आफ्नो पुरुष र महिला दुबै टोली हेर्ने गरी मुख्य प्रशिक्षकमा नियुक्त गरेका हुन् ।

योसँगै प्रशिक्षक बस्न्यात विदेशी राष्ट्रिय टोलीको मुख्य प्रशिक्षकको जिम्मेवारी सम्हाल्ने (टीम गेममा) पहिलो नेपाली प्रशिक्षकसमेत बनेका छन् । अन्य खेलमा भने यसअघि टेबल टेनिसका सुरेन्द्र सुवालले भुटानको राष्ट्रिय टोली सम्हालेका थिए ।

सुरेन्द्रको नेतृत्वमा भुटानले अन्तर्राष्ट्रिय प्रतियोगितासमेत खेलेका थिए । प्रशिक्षक बस्न्यातले कोरियाको मुख्य प्रशिक्षकका लागि आफूले हस्ताक्षर गरिसकेको जानकारी दिँदै उनले भने, ‘केही समय अघि प्रशिक्षकका लागि आवेदन मागिएको थियो, त्यसमा मैले पनि प्रयास गरेको थिए’, उनले भने, ‘त्यसमा छनौट भएपछि मैले सम्झौतासमेत गरिसकेको छु ।’ उनकाअनुसार कोरियाले उनलाई आगामी एक वर्षका लागि मुख्य प्रशिक्षकका रूपमा नियुक्त गरेको हो । अर्काे वर्ष अगष्ट र सेप्टेम्बरमा इण्डोनेशियामा हुने एशियाली खेलकुदको तयारीमा रहेको कोरियाले आफ्नो क्रिकेट टोलीका लागि बस्न्यातलाई मुख्य प्रशिक्षकमा नियुक्त गरेको हो ।

दक्षिण कोरियाले आफ्नो टोलीका लागि बस्न्यातसहित दुई अष्ट्रेलियन प्रशिक्षक पनि नियुक्त गरेको छ । अष्ट्रेलियन प्रशिक्षकबारे जानकारी नगराईए पनि उनीहरूले मुख्य प्रशिक्षक बस्न्यातकै नेतृत्वमा रहेर काम गर्ने बुझिएको छ ।