काठमाडौं, फागुन १५ ।
इङ्गलिश प्रिमियर लिग फुटबलमा चेल्सीले स्वान्सी सिटीलाई हराउँदै अंक तालिकामा आफ्नो अग्रता फराकिलो पारेको छ । शनिबार राति भएको खेलमा चेल्सीले स्वान्सी सिटीलाई ३ विरुद्ध १ गोलले हराएको हो । खेलमा चेल्सीलाई विजयी गराउन स्पेसिन खेलाडीहरु फाब्रिगास, पेड्रो र डिएगो कोष्टाले एक एक गोल गरे भने स्वान्सी सिटीका लागि फर्नान्डो लोरेन्तेले एक गोल फर्काएका थिए । राति भएको अर्को खेलमा एभर्टनले सण्डरल्याण्डलाई २ विरुद्ध शून्य गोलले हराएको थियो । एभर्टनलाई जिताउन रोमेलु लुकाकु र ईद्रीसा गानाले एक एक गोल गरेका थिए ।

यसैगरी क्रिष्टल प्यालेसले मिडिल्सब्रोलाई १ विरुद्ध शून्य गोलले हराउँदा वेष्ट ब्रोमले बर्नमाउथलाई २ विरुद्ध १ गोलले पराजित ग¥यो । प्रिमियर लिग अन्तर्गत अरू खेलमा हल सिटी र ब्रर्नले तथा वाट्फोर्ड र वेष्ट ह्याम युनाईटेडले एक एक गोलको बराबरी खेले ।

रातिका खेलहरूपछि प्रिमियर लिगको अंक तालिकामा २६ खेलबाट ६३ अंक जोडेको चेल्सी शीर्ष स्थानमा छ भने एक खेल कम खेलेको म्यान्चेस्टर सिटी ५२ अंकसहित दोस्रो स्थानमा छ । ५० अंकको साथ टोटनह्याम हट्सपर तेस्रो स्थानमा छ । समान ५० अंक जोडेको आर्सनल गोल अन्तरको आधारमा चौथो स्थानमा रहेको छ ।