एजेन्सी, श्रावण ६ ।
अमेरिकाका एक चर्चित पप गायक चेष्टर बेनिङ्गटनले आफ्नै घरमा आत्महत्या गरेका छन् । लस एञ्जलसस्थित आफ्नो घरमा उनले घाँटीमा पासो लगाएर झुण्डिएर आत्महत्या गरेको स्थानीय प्रहरीले जनाएको छ ।

४१ वर्षीय चेष्टर विश्व प्रख्यात साँगीतिक समूह लिङ्कन पार्कका प्रमुख गायकसमेत रहेका थिए । उक्त ब्याण्ड आफ्नो पछिल्लो एल्बम ‘वान मोर लाइट’ को प्रचारात्मक कार्यक्रम लिएर विभिन्न देशको भ्रमणमा रहेकै समयमा गायक चेष्टरले झुण्डिएर आत्महत्या गरेका हुन् ।

अमेरिकी सञ्चारमाध्यमले उल्लेख गरेअनुसार घरमा कोही नभएको समयमा उनले आत्महत्या गरेका हुन् । परिवारका सदस्यहरू बाहिर रहेको मौका छोपेर उनले आत्महत्या गरेको बताइएको छ ।

उनी यसअघि लागू औषध र मदिरा सेवनका अम्मली थिए । उनले आत्महत्या गर्नुको कारण खुल्न नसकेको प्रहरी अधिकारीहरूको भनाई रहेको छ ।