काठमाडौं, फागुन १६ ।
गएराति सम्पन्न भएको लिग कपको उपाधि म्यानचेस्टर युनाईटेडले हात पार्न सफल भएको छ । साउथ ह्याम्पटनलाई ३–२ गोलले पराजित गर्दै युनाईटेडले लिग कपको उपाधिमाथी कब्जा जमाउन सफल भएको हो ।

सो खेलमा युनाईटेडका ज्लाटान इब्राहिमोभिच निर्णायक व्यक्ति बनेका छन् । २ विरुद्ध शून्य गोलको अग्रतालाई जोगान नसक्दा युनाईटेडले उपाधिका लागि कडा संघर्ष गर्नु परेको थियो ।

खेल सकिन मात्र ३ मिनेट बाँकी रहँदा एण्डेर हेरेराको क्रसमा इब्राहिमोभिचले हेडमार्फत गोल गरेपछि जोसे माउरिन्होको नेतृत्वमा युनाईटेडले सिजनको पहिलो उपाधि जितेको थियो । १९ औँ मिनेटमा इब्राहिमोभिचले फ्रिकिकमार्फत गोल गर्दै युनाईटेडलाई अग्रता दिलाएका थिए । युनाईटेडका लागि जेसी लिङगार्डले ३८ औँ मिनेटमा गोल गरेका थिए । पहिलो हाफको अन्त्य र दोश्रो हाफको सुरुवातमा मिनालो गाबिण्डिनीले दुई गोल गरेपछि युनाईटेड दबाबमा परेको थियो ।

पहिलो हाफको इञ्जुरी समयको पहिलो मिनेटमा पहिलो गोल गरेका गाबिण्डिनीले ४८ औँ मिनेटमा बराबरी गोल गरेका थिए । तर, खेलको अन्त्यतिर इब्राहिमोभिच टोलीका लागि पुनः नायक साबित भए र उनले निर्णायक गोल गरे ।

उता, प्रिमियर लिगमा भने युनाईटेड लिगको पाँचौँ स्थानमा रहेको छ । पछिल्लो समय युनाईटेडले प्रिमियर लिगमा राम्रो प्रदर्शन गरिरहेको छ ।