काठमाडौं, फागुन १७ ।
जारी इङ्गलिस प्रिमियर लिगमा साबिक बिजेता लेस्टर सिटीले प्रशिक्षक क्लाउडियो रानिएरीलाई बर्खास्तपछिको पहिलो खेलमा जित दर्ता गरेको छ ।

लिगअन्तर्गत गएराति घरेलु मैदानमा भएको खेलमा लेस्टर सिटीले शीर्ष चारको होडमा रहेको लिभरपुललाई ३–१ गोलले हराएको हो । लेस्टरलाई जिताउन जेमी भर्डीले दुई तथा ड्यानी ड्रिङ्कवाटरले एक गोल गरेका थिए भने खेलमा लिभरपुलका लागि एक मात्र गोल फिलिप कोन्टिन्होले गरेका थिए ।

यो सिजनमा क्लबले लगातार खराब प्रदर्शन गरेपछि लेस्टर सिटीले गएको हप्ता अघिल्लो सिजन लगभग असम्भव जस्तै मानिएको प्रिमियर लिगको उपाधि दिलाउने प्रशिक्षक रानिएरीलाई बर्खास्त गरेको थियो । रानिएरीलाई बर्खास्त गरेपछिको पहिलो खेलमा लेस्टरले बलियो टीम लिभरपुललाई हराएको हो । भर्डीले २८ र ६० औँ मिनेटमा गरी दुई गोल गरेका थिए भने ड्रिङ्कवाटरले ३९ औँ मिनेटमा गोल गरेका थिए ।

लिभरपुलका लागि ६८ औँ मिनेटमा एक गोल फर्काएका हुन् । लेस्टर सिटीले कार्यबाहक प्रशिक्षक क्रेग शेक्सपियरको प्रशिक्षणमा राम्रो प्रदर्शन गरेको हो । लेस्टर सिटीले लिगामा सन् २०१७ लागेपछि पहिलो पटक गोल गरेको हो । जितपछि लेस्टर रेलिगेशन जोनबाट पनि बाहिर निस्किएको छ । २६ खेलबाट २४ अंक जोडेको लेस्टर १५ औँ स्थानमा रहेको छ । पराजित भएको लिभरपुल भने २६ खेलबाट ४९ अंकसहित पाँचौँ स्थानमा रहेको छ ।