गीतकार अमरद्वारा ‘ममता’ एल्बमको विमोचन

काठमाडौं, फागुन १७ ।
गीतकार, गायक एवं साहित्यकार सुरेन्द्र महर्जन ‘अमर’ को प्रमुख आतिथ्यमा गीतकार ममता राईको एकल रचना र गायक तथा संगीतकार सबिन लिम्बुको संगीतमा श्रृजित अडियो सिडी ‘ममता’ राजधानीमा एक कार्यक्रमको आयोजना गरी गीतकार सुरेन्द्र महर्जन ‘अमर’द्वारा सार्वजनिक गरिएको छ ।
कार्यक्रमका सभापतिसमेत रहेका गीतकार राईले देशप्रतिको माया, मोहका कारण विदेशमा रहेर पनि आफूले रचेको रचना नेपाली गीत, संगीतप्रति समर्पित गरेको बताएकी उनले एल्बम बिक्रीबाट उठेको रकम अनाथ र असहाय व्यक्तिहरूमा समर्पित गर्ने बताइन् । सोही कार्यक्रममा आश्रम बनाउनका लागि आईबहादुर खालिङ्ग र सोमाया राईले लाखौं पर्ने आफ्नो जग्गा उपलब्ध गराई ठूलो गुण गरेको बताउँदै उनीहरूलाई सम्मान गरिएको थियोे । समारोहमा मकरबहादुर राई, अर्जुन खालिङ्ग राई, जसबहादुर राई, भुवन राई, जेनी राई, प्रकाशबहादुर राईलगायतले गीतकारका बारेमा आ–आफ्ना बिचार व्यक्त गरेका थिए ।
संगीतकार, गायक एवं एरेञ्जर सबिन लिम्बुले एल्बममा समावेश गरिएका केही गीत गाएर कार्यक्रमलाई थप संगीतमय बनाएका थिए । सार्वजनिक गरिएको उक्त एल्बममा चर्चित गायक/गायिकाहरू राजेश पायल राई, प्रमोद खरेल, मेलिना राई, पूर्ण खालिङ्ग राई, सबिन लिम्बु र यशोदा खालिङ्ग राईले सुमधुर स्वर दिएका छन् ।
‘ममता’ एल्बम एम सिरिजले बजारमा ल्याएका हुन् । कार्यक्रम के.के अधिकारीले सञ्चालन गरेका थिए ।
प्रतिक्रिया