काठमाडौं, श्रावण २३ ।
हरेक वर्ष गाईजात्रा पर्वको अवसरमा आयोजना हुँदै आएको विशेष हाँस्यब्यङ्ग्य कार्यक्रम यस वर्ष पनि ‘तिरे–जिरे–ब्रेकफेल गाइजात्रा’को नामबाट भोलि श्रावण २४ गतेबाट सुरु हुने भएको छ । राजधानीको प्रज्ञा भवन कमलादीमा आयोजना हुने उक्त कार्यक्रमको लागि आवश्यक तयारी भइरहेको आयोजक कारोबार मिडिया (प्रा.)लि.ले जनाएको छ ।

हाँस्य कलाकारहरूको प्रत्यक्ष प्रस्तुतिमार्फत मनोरञ्जन लिन सकिने उक्त कार्यक्रममा कलाकारहरूले विद्यमान राजनीतिक तथा सामाजिक विकृतिहरूलाई व्यङ्ग्यात्मक प्रस्तुतिमार्फत आलोचना गरी सुधार गर्न दबाब दिँदै आइरहेको छ । कार्यक्रम श्रावण २४ गतेबाट भाद्र ३ गतेसम्म अर्थात १२ दिनसम्म चल्ने आयोजक संस्थाले जनाएको छ ।

लोकप्रिय हाँस्यब्यङ्ग्य टेलिभिजन कार्यक्रम तिते–जिरे र ब्रेकफेललाई संयोजन गरी ती कार्यक्रमसम्बद्ध कलाकारहरूको ‘तिरे–जिरे–ब्रेकफेल गाइजात्रा’मा प्रस्तुति रहने छ । दर्शकहरूलाई मनोरञ्जनसँगै विकृति र विसंगतिहरूविरुद्ध तिखो प्रहार गर्ने मौका पनि यो हो भन्दै व्यस्तता र तनाबको दैनिकीबाट मुक्त हुने र हाँसेर स्वस्थ हुने पनि यो मौका भएको आयोजक संस्थाले जारी गरिएको विज्ञप्तिमा उल्लेख गरिएको छ ।

यस वर्षको गाइजात्रा विशेषको मुख्य कलाकारहरूमा दीपकराज गिरी, शिवहरी पौडेल, किरण के.सी., मनोज गजुरेल, शैलेन्द्र सिंखडा, राजाराम पौडेल, दमन रूपाखेती, पूर्ण थापा, रबि डंगोल, मनोज आचार्य, टीका भण्डारी, शिवहरी बैरागी, सबिता गुरुङ, निरज नेपाल, कविता शर्मा, सरिश्मा मगरलगायत रहने छन् ।