काठमाडौं, फागुन १९ ।
ला लिगाको बिहीबार बिहान सकिएको खेलमा स्पोर्टिङ गिजोनलाई ६ विरुद्ध १ गोलले पराजित गरेपछि बार्सिलोनाका प्रशिक्षक लुइस एनरिकले क्लब छोड्ने घोषणा गरेका छन् ।

उनले पत्रकार सम्मेलनमा केही समय फुटबलबाट टाढा रहन यसै सिजनको अन्त्यमा बार्सिलोना छोड्ने जनाएका छन् । दुई साताअघि च्याम्पियन्स लिगअन्तर्गत फ्रान्सको पेरिस सेन्ट जर्मनी (पिएसजी)सँग नकआउट चरणको पहिलो लेगको खेलमा ४ विरुद्ध शून्य गोलले पराजय भएपछि एनरिकको रणनीतिलाई लक्षित गरी प्रश्न उठ्दै आइरहेको थियो ।

पछिल्लो समय टिम छनोटदेखि अन्य कुरामा उनको सुनुवाई हुन छोडेको खबर स्पेनको विभिन्न पत्रपत्रिकामार्फत सार्वजनिक भएको थियो । एनरिकको बार्सिलोनामा यो तेस्रो सिजन हो । उनी घरेलु लिग ला लिगाको ह्याट्रिक गर्ने अभियानमा छन् । ४६ वर्षीय एनरिकले प्रशिक्षकबाट अवकास लिने निर्णय गरेपछि बार्सिलोनाका प्रभावशाली पूर्व प्रशिक्षक पेप ग्वार्डिओलाले आफ्ना पूर्व सहपाठीप्रति सहानभूती प्रकट गरेका छन् ।