काठमाडौं, फागुन २४ ।
इंग्लिस प्रिमियर लिग फुटबलको अंक तालिकामा शीर्ष स्थानमा रहेको चेल्सीले १० अंकको अग्रता कायम राखेको छ । लिगअन्तर्गत सोमबार राति भएको खेलमा वेष्ट ह्याम युनाइटेडलाई २ विरुद्ध १ गोलले पराजित गर्दै चेल्सीले आफ्नो शिर्ष स्थान १० अंकको दुरीमा पुर्याएको हो ।

वेष्ट ह्यामको घरेलु मैदानमा भएको खेलमा चेल्सीलाई जिताउन इडेन हाजार्ड र डिएगो कोष्टाले समान एक एक गोल गरे । यो जितसंगै चेल्सीले दोस्रो स्थानको टोटनह्यामलाई १० अंकले पछि पारेको थियो । वेष्ट ह्यामका म्यनुएल लान्जिनीले एक गोल फर्काएका थिए ।

लण्डन स्टेडियममा भएको खेलमा चेल्सीले २५ औं मिनेटमा हाजार्डको गोलबाट सुरुवाती अग्रता लिएको थियो । पहिलो हाफ १ विरुद्ध शून्य गोलले अगाडि रहेको चेल्सीले दोस्रो हाफमा अग्रता दोब्बर बनायो । खेलको ५० औ मिनेटमा कोष्टाले गोल गर्दै चेल्सीको अग्रता २ विरुद्ध शून्य गोलमा ल्याएका थिए । त्यसपछि खेलको इन्जुरी समयमा वेष्ट ह्यामका लान्जिनीले एक गोल फर्काएपनि टोलीको हार टार्न सकेन ।

जितसंगै चेल्सीले यो सिजन इंग्लिस प्रिमियर लिगमा २१ औं जित आत्मसात गर्यो । जितसंगै शिर्ष स्थानको चेल्सीले २७ खेलबाट ६६ अंक जोडेको छ । दोस्रो स्थानको टोटनह्यामको ५६ तथा तेस्रो स्थानको म्यानचेस्टर सिटीको ५६ अंक छ ।