काठमाडौं, फागुन २७ ।
आइसीसी विश्व क्रिकेट लिग च्याम्पियन्सीपअन्तर्गत नेपालविरुद्ध एकदिवसीय खेल खेल्न केन्याका राष्ट्रिय क्रिकेट टोली काठमाडौं आईपुगेको छ ।

भारतमा अभ्यास र तयारी गरेको अफ्रिकी मुलुक केन्याको टोलीले भोलि शनिबार र सोमबार नेपालसँग दुईवटा एकदिवसीय खेल खेल्ने छ । आठ राष्ट्र सहभागी विश्व क्रिकेट लिग च्याम्पियनसिपको अंक तालिकामा केन्या पाँचौ स्थानमा रहेको छ ।

हालसम्म खेलेका ८ खेलमध्ये केन्याले ४ खेलमा जित र ४ खेलमा हार बेहोरेको छ । समान रूपमा खेलेको नेपाल अंक तालिकामा ६ अंकसहित छैटौ स्थानमा रहेको छ ।

नेपाल र केन्या दुवै टोलीलाई अंक तालिकाको शीर्ष चार स्थानमा ठाउँ रहन खेल जित्नै पर्ने दबाब छ । उता नेपाली कप्तान पारस खड्काले भोलि हुने खेल खेल्ने वा नखेल्ने भन्ने विषयमा अझ पनि निश्चित भएको छैन । दुई साता अघिमात्रै पेटको शल्यक्रिया गरेका पारस पुर्ण फिट भईसकेका छैनन् । तर पनि पछिल्लो चार दिनदेखि अभ्यास गरिरहेका छन् ।