नेपालगञ्ज, फागुन २९ ।
जारी रहेको नेपालगञ्ज गोल्ड कप फुटबल प्रतियोगिताअन्तर्गत आज भएको खेलमा चर्चित टीम मनाङ मस्र्याङ्दीलाई १–२ गोल अन्तरले पराजित गर्दै रूपन्देही–११ सेमिफाइनलमा प्रवेश गर्न सफल भएको छ ।

खेलको ७५ औँ मिनेटमा आएर सुशील लामाले गरेको गोलपछि अग्रता लिएको मनाङले आफ्नो जितलाई भने सुनिश्चित गर्न सफल हुन सकेन । खेलको ८७ र ८८ औँ मिनेटमा रूपन्देहीका लागि उत्तम गुरुङ र अमर डंगोलले एक/एक गोल गरेपछि मनाङको अगाडिको खेल यात्रा रोकिन पुगेको हो ।

नकआउटका आधारमा खेलाइएको खेलमा यो हारसँगै मनाङ खेलबाट बाहिरिएको छ । प्रतियोगिताअन्तर्गत भोलि सोमबार पहिलो सेमिफाइनल खेल सङ्कटा क्लब र सुदूरपश्चिम–११ बीच खेल हुनेछ ।