काठमाडौं, फागुन ३० ।
आईसीसी विश्व क्रिकेट लिग च्याम्पियनशीपअन्तर्गत आज नेपालले केन्यासँग दोश्रो खेल खेल्ने भएको छ । काठमाडौंको कीर्तिपुरस्थित त्रिवि मैदानमा हुने खेलमा नेपाल जित निकाल्ने लक्ष्यसहित मैदानमा उत्रिने तयारीमा रहेको छ ।

केन्यासँग आज हुने खेल पनि गुमाएको खण्डमा नेपाललाई च्याम्पियनशीपको शीर्ष ४ भित्र पर्न कठिन हुनेछ । एक दिवसीय ढाँचामा नेपालले आजसम्म केन्यालाई हराउन सकेको छैन । आजको खेल जितेमा नेपालले केन्याविरुद्ध एउटा कोशेढुङ्गासमेत पार गर्नेछ ।

पहिलो खेलमा नेपाललाई हराएको केन्या प्रतियोगितामा पाँच खेल बाँकी रहँदा १० अंकसहित पाँचौँ स्थानमा छ । आठ राष्ट्रको सहभागिता रहेको च्याम्पियनशीपमा नेपाल ६ अंकसहित छैठौँ स्थानमा रहेको छ । नेदरल्याण्ड्स १६, पपुवा न्यूगिनी १२, तथा हङकङ र स्कटल्याण्डको समान ११/११ अंक रहेको छ ।

शीर्ष चारमा रहने राष्ट्रले अर्को वर्ष हुने विश्वकप छनौटमा सिँधै प्रवेश पाउने छन् । च्याम्पियनशीपमा केन्यापछि नेपालले हङकङसँग उसकै मैदानमा तथा युएईसँग तटस्थ मैदानमा दुई दुई वटा खेल खेल्नेछ ।