काठमाडौं, चैत्र २ ।
इङ्गलिस फुटबल क्लब लेष्टर सिटी युरोपियन च्याम्पियन्स लिग फुटबलको क्वाटर फाइनलमा प्रवेश गरेको छ ।

गएराति भएको प्रि–क्वाटर फाइनल दोश्रो लेगको खेलमा लेष्टरले स्पेनिस क्लब सेभियालाई २ विरुद्ध शून्य गोलले पराजित गरेको हो । लेष्टरलाई जिताउन वेस मोर्गान र मार्क अल्ब्राईटनले एक–एक गोल गरेका थिए ।

दोश्रो लेगमा हात पारेको २ विरुद्ध शून्य गोलको जितपछि लेष्टर सिटी समग्रमा ३–२ ले विजयी हुँदै क्वाटर फाइनलमा पुगेको हो । पहिलो लेगको खेलमा सेभिया २–१ ले विजयी भएको थियो ।

पहिलो पटक च्याम्पियन्स लिग खेलिरहेको लेष्टर सिटी पहिलो सहभगितामै अन्तिम आठमा पुग्न सफल भएको हो ।

च्याम्पियन्स लिगअन्तर्गत गएराति भएको अर्को खेलमा ईटालीको युभेन्ट्सले पोर्चुगलको एफसी पोर्टोलाई १ विरुद्ध शून्य गोलले पराजित गरेको छ । सो खेलमा युभेन्ट्सलाई विजयी गराउन पाउलो डिबालाले निर्णायक गोल गरेका थिए ।

पहिलो लेगमा २ विरुद्ध शून्य गोलले विजयी भएको युभेन्ट्स गएरातिको खेलपछि समग्रमा ३ विरुद्ध शून्य गोलेका परिणाम निकाल्दै अन्तिम आठमा पुगेको हो ।

च्याम्पियन्स लिग फुटबलमा आज राति दुई खेल हुने छन् । आज स्पेनको एथ्लेटिको मड्रिड र जर्मनीको बायर लिभरकुजेन भिड्दा फ्रान्सको मोनाकोले इङ्गल्याण्डको म्यान्चेस्टर सिटीसँग खेल्नेछ ।