काठमाडौं, चैत्र २ ।
एसीसी इमर्जिङ नेशन्स कप क्रिकेट प्रतियोगिता चैत्र १२ गतेदेखि सुरु हुने छ । उक्त प्रतियोगिताका लागी ज्ञानेन्द्र मल्लको कप्तानीमा नेपाली टिमको घोषणा गरिएको छ । आइसीसीका डेभलपमेन्ट अफिसर राजु बेंकटपति, नेपाली टोलीका प्रशिक्षक जगत टमाटा, कप्तानहरू पारस खड्का र ज्ञानेन्द्र मल्लले प्रतियोगिताका लागि चार बैकल्पिकसहित नेपाली १५ सदस्यीय नेपाली टोलीको छनौट गरेका छन् ।

इमर्जिङ टिम्स कपमा नेपालका भेट्रान स्पिनरहरू शक्तिप्रसाद गौचन, बसन्त रेग्मी तथा फष्ट बलर सोमपाल कामीलाई आरामको समय दिइएको छ । यता नियमित कप्तान पारस खड्काले स्वास्थ्य अवस्थाका कारण यसअघि नै इमर्जिङ कप नखेल्ने घोषणा गरिसकेका छन् ।
घोषित टोलीको कप्तान र उपकप्तान क्रमशः ज्ञानेन्द्र मल्ल र शरद भेषावकर छन् । त्यस्तै टोलीका अन्य सदस्यमा बिनोद भण्डारी, सागर पुन, मोहम्मद आरिफ शेख, मेहवुव आलम, दिपेन्द्र सिंह ऐरी र सन्दीप लामिछाने रहेका छन् ।

त्यसैगरी मोहम्मद आसिफ शेखले राष्ट्रिय टोलीमा स्थान बनाएका छन् । अभिनाश कर्णलाई सोमपालको स्थानमा ल्याइएको छ । सुनिल धमलाले केन्यासँग खेलेको खेलमा जस्तै नेपालको ओपनिङ गर्नेछन् । त्यस्तै चार बैकल्पिक खेलाडीहरूमा भुवन कार्की, शुसान भारी, दिपेश श्रेष्ठ र दिलिप नाथ छन् ।

कुशल भुर्तेल, जितेन्द्र मुखिया, राजेश पुलामी मगर, सुशील कँडेललाई रिजर्भ प्लेयरको रुपमा टिममा बोलाइएको छ । चैत्र २२ गतेसम्म चल्ने प्रतियोगितामा नेपाल समूह ‘बी’ मा छ । यस समूहमा नेपालसँगै पाकिस्तान, बंगलादेश र हङकङ छन् ।