काठमाडौं, चैत्र ६ ।
क्रिष्टियानो रोनाल्डोले स्पेनिस ला लिगाअन्तर्गत आइतबार राति एथ्लेटिको बिल्बाओसँगको खेलमा निकै राम्रो प्रदर्शन गरे ।

गोल गर्न नसके पनि दुवै गोलका लागि रोनाल्डोले सहयोग गरे । यो खेलमा रियल २ विरुद्ध १ गोलले विजयी भएको थियो । तर प्रशिक्षक जिनेदिन जिदानले रोनाल्डोलाई खेलको १५ मिनेट बाँकी हुँदा नै मैदान बाहिर बोलाएर उनको ठाउँमा अर्को खेलाडीलाई पठाएको थियो ।

खेलपछि प्रशिक्षक जिदानले रोनाल्डोलाई रिप्लेस गर्नुको कारण प्रष्ट पार्न खोजे । मिडफिल्डमा इस्कोसँगको समन्वय थप व्यवस्थित गर्न चाहेको र खेलको फरम्याट ४–४–२ मा परिवर्तन गरेकाले रोनाल्डोलाई रिप्लेस गरिएको जिदानको भनाई छ । जिदानले भने ‘रोनाल्डोलाई पनि अरू खेलाडीलाई जस्तै रिप्लेस गर्न सकिन्छ । उनले निकै खुशी भएर खेल सकाए किनकी हामीले जित निकालेका थियौं ।’ यो खेलमा रियल मड्रिड २ विरुद्ध १ गोलले विजयी भएको थियो । जितपछि शीर्ष स्थानको रियल मड्रिडले दोस्रो स्थानको बार्सिलोनासँग पाँच अंकको अग्रता कायम गरेको छ ।