काठमाडौं, चैत्र १० ।
विश्व विजेता जर्मनीले अन्तर्राष्ट्रिय मैत्रीपूर्ण खेलमा इंग्ल्याण्डलाई पराजित गरेको छ । लुकास पोडोलस्कीको बिदाई खेलमा पोडोलस्कीले नै गोल गरेपछि बुधबार राती भएको खेलमा जर्मनीले इंग्ल्यान्डलाई १ विरुद्ध शून्य गोलले पराजित गरेको हो ।

जर्मनी पहिलो हाफमा गोलरहित बराबरीमा रोकिएको थियो । तर ६९ औं मिनेटमा लुकास पोडोस्कीले जर्मनीका लागि विजयी गोल गरे ।

अन्तर्राष्ट्रिय फुटबलबाट सन्यासको घोषणा गरेका पोडोस्कीले इंग्ल्याण्डसँगको खेलमा टिमको कप्तानी गर्दै जर्मनीका लागि विजयी गोल गरे । उनको यो विदाई निकै शानदार रह्यो । उनलाई डर्टमुण्डको रंगशालामा रहेका दर्शकले उठेर सम्मान स्वरूप अभिवादन गरेका थिए ।

सन् २००४ मा जर्मनीको सिनियर राष्ट्रिय टिममा डेब्यु गरेका पोडोलस्कीले जर्मनीको टिमबाट १३० खेल खेलेका छन् । जसमा पोडोलस्कीले ४९ गोल गरेका छन् । पोडोलस्कीले आफ्नो करियरमा सात वटा मुख्य अन्तर्राष्ट्रिय प्रतियोगिता खेलेका छन् । सन् २०१४ को विश्वकप जित्दा महत्वपूर्ण खेलाडी रहेका उनले सन् २००६ को विश्वकपमा बेष्ट योङ प्लेअरको अवार्डसमेत जितेका थिए ।