काठमाडौं, चैत्र १४ ।
एसिसी इमर्जिङ नेशनल कप क्रिकेटमा नेपाल र पाकिस्तानबीच खेलमा २३ वर्षमुनि (यु–२३) उमेर समूहको टोलीसँग प्रतिस्पर्धा भइरहेको छ । बंगलादेशको कक्स बजाराम पाकिस्तानले टस जितेर फिल्डिङ रोजेपछि नेपाल अहिले ब्याटिङ गर्दैछन् ।

नेपालले २९ ओभरको खेल सकिँदा तीन विकेटको क्षतिमा ८९ रन बनाएको छ । नेपालका कप्तान ज्ञानेन्द्र मल्ल दुई, सागर पुन चार तथा दिपेन्द्र सिंह ऐरी १४ रन बनाएर आउट भए । पाकिस्तानका गुलाम मुदास्सारले दुई तथा बिलाल आसिफले एक विकेट लिएका छन् ।

टोलीमा कप्तानको जिम्मेवारी नियमित उपकप्तान ज्ञानेन्द्र मल्लले पाएका छन् । उनले यसअघि घरेलु मैदानमा गएका फागुन महिनामा भएको आईसिसी विश्व लिग क्रिकेट प्रतियोगताअन्तर्गत केन्याविरुद्धको खेलमा कप्तानको भूमिका निर्वाह गरेका थिए ।

त्यसैगरी शक्ति गौचन, बसन्त रेग्मी र सोमपाल कामी प्रतियोगितामा सहभागी छैनन् भने फास्ट बलर करण केसी पनि स्वास्थ्य समस्याका कारण बिदामा छन् । वरिष्ठ खेलाडीहरू बिदामा बसेका कारण यस पटक तीन नयाँ खेलाडी आशिफ शेख, दिलीप नाथ र दीपेश श्रेष्ठले पहिलो पटक खेल्न लागेका हुन् ।

खेल तालिकानुसार नेपाल समूह ‘बी’ मा छ । सोही समूह ‘बी’मा आयोजक बङ्गलादेश, पाकिस्तान र हङकङ छन् । त्यस्तै समूह ‘ए’ मा भने भारत, श्रीलङ्का, अफगानिस्तान र मलेसिया छन् ।

उक्त प्रतियोगिता करिब चार वर्षपछि हुन लागेको हो । यसअघि सन् २०१३ मा सिङ्गापुरमा भएको थियो । यही चैत्र १२ गतेदेखि सुरु भएको उक्त प्रतियोगिता चैत्र २२ गतेसम्म चल्नेछ ।