भक्तपुर, चैत्र १४ ।
शिक्षासँग सरोकार राख्ने अभिभावक संघ नेपाल, प्याब्सन र एन प्याब्सनका पदाधिकारीले सरकारको कमजोरीकै कारण नेपालको शैक्षिक क्षेत्रको विकास हुन नसकेको आरोप लगाएका छन् ।

आज आयोजना गरेको एक साक्षात्कार कार्यक्रममा बोल्दै उनीहरूले सरकारले शिक्षा क्षेत्रमा गरेको लगानी बालुवामा पानी राखे सरह भएको भन्दै सरकारले शिक्षा क्षेत्रमा गरेको लगानीको अनुगमन गर्न नसक्दा सामुदायिक विद्यालयको अवस्था दिन प्रतिदिन खस्कँदै जानु र हचुवाका भरमा पटक–पटक शिक्षा नियमावली परिवर्तन गरिनु र काम पुरानै शैलीमा हुने गरेकाले यस क्षेत्रको विकास हुन नसकेको आरोप लगाएका हुन् ।

अभिभावका संघ नेपालका अध्यक्ष केशव पुरीले सरकारी शिक्षण संस्थाहरूको कमजोरीका कारण निजि नाम चलेका विद्यालयहरूले आर्थिक ब्रम्ह लुट गर्दै अभिभावक माथि धान्नै नसक्ने आर्थिक भार थुपारेको बताएका हुन् ।

उनले विश्वमै कतै नभएको शैक्षिक कर निजि विद्यालयले सिधै एक प्रतिशत कर विद्यार्थीको टाउकोमा लाद्नु गलत भएको भन्दै यस्तो कर विद्यार्थीले नभएर सञ्चालकले बेहोर्नु पर्नेमा जोड दिएका छन् ।

उनले निजि विद्यालयको शैक्षिक प्रणाली एकै हुनु पर्ने भन्दै समय अनुकुल विद्यार्थी शुल्कलाई परिमार्जन गरिनु पर्ने बिषय उठान गर्दा अभिभावकलाई प्याब्सन र एन प्याब्सनले दुश्मनको व्यवहार गर्ने गरेको गुनासो गर्‍यो । प्याब्सनया अध्यक्ष विजय सम्बाहाम्फेले नेपालको भूगोल अनुरुपको शिक्षा प्रणाली लागू गर्न नसक्दा समस्या देखिएकाले सोच अनुरुप प्रतिफल प्राप्त हुन नसकेको बताए ।

उनले राज्यका महत्वपूर्ण पदमा बसेका व्यक्तिहरूले नेपालको शैक्षिक क्षेत्रका बारे जानकारी नहुँदा विभिन्न समयमा नेपाल सरकारले निजि विद्यालयमा पटक–पटक अंकुश लगाउने काम गलत भएको बताएका छन् । एन प्याब्सनका अध्यक्ष कर्ण बहादुर शाहिले नेपालका निजि विद्यालयले समय अनुरुप सञ्चालन हुँदै आएको र सरकारी विद्यालय राम्रो भए निजि विद्यालय डुब्छन् भन्ने भनाई भ्रम मात्र भएको भन्दै सरकारले प्रदान गर्न नसकेको शिक्षा क्षेत्रको विकासमा महत्वपूर्ण भूमिका खेलिरहेको बताएका छन् ।

न्यायलयलेसमेत विद्यालयका शुल्कका बिषयमा जारी गरेको निर्देशन समयानुकुल नभएको भन्दै उपत्यकामा सञ्चालनमा रहेका निजि विद्यालयलाई जस्तै अन्य बिकट जिल्लाका निजि विद्यालयलाई एकै स्थानमा राखिनु न्याय पूर्ण नरहेको बताए ।