काठमाडौं, चैत्र १४ ।
एसिसी इमर्जिङ टिम्स कप क्रिकेटअन्तर्गत नेपाल पाकिस्तानसँग ६ विकेटले पराजित भएको छ । टस हारेर पहिले ब्याटिङ गरेको नेपालले एक सय ८१ रनको लक्ष्य दिएको थियो । पाकिस्तानले ४५ ओभर एक बलमा ४ विकेट जाँदा लक्ष्य पूरा गरेको हो । पाकिस्तानका लागि इमाम उलहकले सतक बनाए । एक सय ३५ बल खेलेका उनले ९ चौकाको सहयोगमा अभिजित एक सय ४ रन बनाए । नेपालका ज्ञानेन्द्र मल्ल र सन्दिप लामिछानेले दुई दुई विकेट लिए ।

पहिले ब्याटिङ गरेको नेपालले निर्धा्रित ५० ओभरमा ९ विकेटको क्षतिमा एक सय ८० रन बनाएको हो । नेपालका लागि सुनिल धमलाले एक सय २५ बलमा ४३, शरद भेषवाकरले ५९ बलमा ३८, विनोद भण्डारीले ३२ रनमा २४ तथा आरिफ शेखले ३० बलमा नटआउट १८ रन बनाए । यस्तै दिपेन्द्र सिंह ऐरीले २९ बलमा १४, सागर पुनले चार बलमा चार, सुसन भारीले पाँच बलमा तीन तथा कप्तान ज्ञानेन्द्र मल्लले १८ बलमा दुई रन बनाएका थिए । पाकिस्तानका गुलाम मुदास्सारले पाँच, ओसामा मिरले दुई तथा बिलाल आसिफ र जाफर गोहरले एक एक विकेट लिए ।

खेल तालिकानुसार नेपाल समूह ‘बी’ मा छ । समूह ‘बी’मा आयोजक बङ्गलादेश, पाकिस्तान र हङकङ छन् । त्यस्तै समूह ‘ए’ मा भारत, श्रीलङ्का, अफगानिस्तान र मलेसिया छन् । दोस्रो खेलमा नेपालले मंगलबार बंगलादेशसँग खेल्नेछ ।