काठमाडौं, चैत्र १५ ।
इमर्जिङ टिम्स एशिया कप क्रिकेट अन्तर्गत नेपाल र बंगलादेशको खेल सुरु भएको छ । बंगलाखदेशको कक्स बजारस्थित शेख कमल अन्तर्राष्ट्रिय क्रिकेट रंगशालामा टस जितेर नेपालले फिल्डिङ गर्ने निर्णय गरेको थियो । सोमबार पाकिस्तानसँग हार बेहोरेको नेपाली टोलीले घरेलु टोली बंगलादेशविरुद्ध निकै कसिलो बलिङ गरिरहेको छ ।

१७ ओभर पुरा हुँदासम्म बंगलादेशले ४ विकेटको क्षतिमा जम्मा ७२ रन बनाएको छ । नेपालका तर्फबाट दोश्रो ओभरमा अभिनाश कर्णले ३ विकेट लिएपछि बंगालदेश टीम संकटमा परेको हो । नवौं ओभरमा मेहबुब आलमले एक विकेट लिएका छन् ।

नेपाल सोमबार सम्पन्न पहिलो खेलमा भने पाकिस्तानको २३ वर्ष मुनिको टोलीसँग ६ विकेटले पराजित भएको थियो । नेपालका लागि दबाबपूर्ण अवस्था रहेपनि टस जितेर बलिङ रोजेका नेपाली टीमको सुरुआती प्रदर्शनले आजको खेल नेपालको पोल्टामा पर्ने संकेत देखिएको छ ।

सोमबार भने नेपालले सोही कक्स बजारस्थित शेख कमल अन्तर्राष्ट्रिय क्रिकेट रंगशालामा टस हारेर पहिले ब्याटिङ्ग गरेर निर्धारित ५० ओभरमा ९ विकेटको क्षतिमा एक सय ८० रन बनाएको थियो । जवाफमा पाकिस्तानले ४५ ओभर १ बलमा ४ विकेटको क्षतिमा विजय लक्ष्य हासिल गरेको थियो ।

एसियाली क्रिकेट परिषद एसिसीको आयोजनामा भइरहेको प्रतियोगितामा चार एसोसिएट राष्ट्र नेपालसँगै अफगानिस्तान, मलेसिया र हङकङ तथा टेष्ट मान्यताप्राप्त राष्ट्र पाकिस्तान, भारत, बंगलादेश र श्रीलंकाका २३ वर्षमुनिका खेलाडीको सहभागिता छ ।