काठमाडौं, चैत्र १५ ।
बंगलादेशमा जारी रहेको नेपाल र बंगलादेशबीचको इमर्जिङ टिम्स एशिया कप क्रिकेटअन्तर्गत अहिले भर्खरै सम्पन्न खेलमा नेपाल बंगलादेशसँग ८३ रनले पराजित भएको छ ।

दुई सय ५८ रनको लक्ष्य पछ्याएको नेपालले ४२ ओभर ३ बलमा सबै विकेट गुमाउँदै १ सय ७४ रन मात्र बनाउन सफल भएको थियो । नेपालका दिपेन्द्र सिंह ऐरीले अर्धसतक बनाएका थिए । ६ चौकाको मद्दतमा उनले ८५ बलमा ५६ रन बनाएका हुन् । १० बल खेलेका कप्तान ज्ञानेन्द्र मल्ल खाता नखोली आउट भए । १३ बल खेलेका अर्का ओपनर सुनिल धमला पनि एक रनमै आउट भएका थिए ।

यस्तै, आशिफ शेखले १५ बलमा १२ रन बनाए । धरमराएको नेपाली ब्याटिङ दिलिप नाथ र दिपेन्द्र सिंह ऐरीले सम्हालेका थिए । ६२ बलमा ४१ रन बनाउँदा दिलिप आउट भएपछि ब्याटिङ सम्हालिन सकेन । त्यसपछि शरद भेषवाकर ५ बलमा २ रन बनाएर आउट भए । त्यसलगत्तै मेहबुब आलम १७ बलमा १० रन बनाएर आउट भए । विनोद भण्डारीले एक छक्का, ६ चौकाको मद्दतमा २३ बलमा ३३ रन बनाए । यस्तै भुवन कार्की १६ बलमा ६ रन बनाएर आउट भए ।

बंगलादेशका रहतुल जाबेदले चार, सइफ उद्दिनले तीन साथै अबुल हसन राजले दुई विकेट लिए । नेपालले टस जितेर पहिला फिल्डिङ गर्ने निर्णय गरेपछि ब्याटिङमा आएको बंगलादेशले निर्धारित ५० ओभरमा ९ विकेट गुमाएर २ सय ५७ रन बनाएको थियो । नेपालका अभिनाश कर्णले ३ तथा सन्दिप लामिछानेले २ विकेट लिएका थिए । यस्तै मेहबुब आलम, दिपेन्द्र सिंह ऐरी र ज्ञानेन्द्र मल्लले एक एक विकेट लिएका थिए ।

हिजो भएको पहिलो खेलमा नेपाल पाकिस्तानसँग ६ विकेटले पराजित भएको थियो । एशियाली क्रिकेट परिषद् एसीसीको आयोजनामा भइरहेको प्रतियोगितामा चार एशोसिएट राष्ट्र नेपालसँगै अफगानिस्तान, मलेसिया र हङकङ तथा टेष्ट मान्यता प्राप्त राष्ट्र पाकिस्तान, भारत, बंगलादेश र श्रीलंकाका २३ वर्षमुनिका खेलाडीको सहभागिता छ ।

नियमित कप्तान पारस खड्का यस प्रतियोगितामा अनुपस्थित छन् । प्रमुख तीन बलर शक्ति गौचन, सोमपाल कामी र बसन्त रेग्मी पनि टीममा छैनन् । नेपाल रहेको समूह ‘ए’ मा पाकिस्तान, बंगलादेश र हङकङ तथा समूह ‘बी’ मा भारत, श्रीलंका, मलेसिया र हङकङ छन् ।