एजेन्सी, बैशाख २० ।
फिल्ममेकर करण जोहरसँगको बिग्रिँदो सम्बन्धलाई लिएर पछिल्लो समय चर्चामा रहेकी बलिउड अभिनेत्री काजोल फेरी विवादमा मुछिएकी छन् । काजोलले सामाजिक सञ्जालमा आफ्नो एउटा भिडियो शेयर गरेपछि विवाद सिर्जना भएको हो ।

आफ्ना साथीहरूसँग पार्टी मनाईरहेकी काजोलले पार्टीको फेसबुक लाइभ गरेकी थिइन् । जसमा उनले पार्टीको लागी भैँसीको मासु पकाएको बताएकी थिइन् । सोही विषयलाई लिएर उनी विवादमा तानिएकी हुन् । काजोललाई गाईको मासु खाएको आरोपसमेत लगाईएको छ ।

उनले उक्त भिडियो सामाजिक सञ्जालमा शेयर गरेको केही क्षणमा नै हटाएकी थिइन् । विवाद चर्किदै गएपछि उनले ट्वीट गर्दै उक्त मासु गाईको नभई भैँसीको भएको बताएकी छन् ।

उनले ट्वीटमा लेखेकी छन्, साथीहरूसँगै खाना खाएको जुन भिडियो छ, त्यसमा मैले भैँसीको मासु भनेकी थिए र त्यो भैँसीको मासु नै थियो । बाह्य रूपमा यसको गलत प्रचार भएको मात्र हो । भैँसीको मासु कानूनी रूपमा पनि उपलव्ध छ । यो एक संवेदनशील मुद्दा हो । जसले धार्मिक विषयलाई उठाउन सक्छ । यो मुद्दामा म मुछिन चाहन्न ।