काठमाडाैं, भाद्र १७ ।
लामो समयदेखि उपचाररत् नायिका तथा माेडल निशा घिमिरेको मृत्यु भएको छ । हिजो बुधबार साँझ नर्भिक अस्पतालमा उपचारको क्रममा मोडल घिमिरेको मृत्यु भएको हो । उनको आज बिहान पशुपति आर्यघाटमा अन्तिम दाहसंस्कार गरिएको छ । उनको पार्थिव शरीरलाई अन्तिम श्रद्धाञ्जलीको लागि पशुपति आर्यघाटमा राखिएको थियो ।

‘निशा घिमिरे संरक्षण कोष’ ले दाहसंस्कार गर्नु अगाडि उनको पार्थिव शरीरलाई पशुपति आर्यघाट परिसरमा राखेको थियो । निशाको शवलाई केही कलाकार र परिवारले श्रद्धाञ्जली अर्पण गरेका थिए ।

अभिनेत्री बन्ने रहरले डिप्लोमा अध्ययनका लागि भारत पुगेकी कलाकार घिमिरेको सडक दुर्घटनामा परेकाे थियो । दुर्घटनामा परेपछि उनको ब्रेन ह्यामरेज भएको हो । दुर्घटनामा परेपछि उनको लामो समय भारतमै उपचार गरिएकाे थियाे । तर, अस्पतालको खर्च धान्न नसकेपछि परिवारले उनलाई नेपाल ल्याएको थियो ।

उपचार गर्दागर्दै सम्पत्ति सकिएको परिवारले जानकारी दिएपछि उनलाई विभिन्न व्यक्ति तथा संघसंस्थाले आर्थिक सहयोगसमेत गरेका थिए ।पछिल्लो समय निशाका परिवार कोठा भाडा तिर्न गाह्रो भएर भैँसीपाटीमा टिनले बारेर एउटा झुप्रोमा बस्दै आएको छ ।

निशाले नेपाली र मैथिली भाषामा बनेको फिल्म ‘मधेसीपुत्र २’ मा मुख्य भूमिका निभाएकी थिइन् । उनले ‘डियर जिन्दगी’ टेलिश्रृंखला, केही म्यूजिक भिडियोमा पनि काम गरिसकेकी छन् ।