लहान, बैैशाख २८ ।
आज दिउँसो सिरहाको लहानस्थित सगरमाथा अञ्चल यातायात व्यवस्था कार्यालयमा अज्ञात समूहले प्रेसर कुकर बम विस्फोट गराएको छ ।

दिउँसो १ बजेतिर ठूलो आवाजसहित भएको बम विस्फोटमा कुनै मानवीय क्षति नभए पनि कार्यालयको शौचालय भित्ता र झ्यालका सिसा यत्रतत्र छरिएका छन् ।

सेवाग्राहीको भीड लाग्ने समयमा बम विस्फोट हुँदा सेवाग्राहीमा भागदौड मच्चिएको थियो । बम विस्फोटन पछि कार्यालयका सम्पूर्ण कामकाज ठप्प भएको छ भने व्यापक रूपमा सुरक्षाकर्मी परिचालन गरिएको छ ।

कुनै पनि समूहबाट चन्दालगायतको धम्की नआएकाले किन र कसले बम विस्फोट गराएको हो यसबारे आफू अनभिज्ञ रहेको कार्यालय प्रमुख न्यौपानेले बताएका छन् ।

उक्त विस्फोट गराउने समूहको खोजी भइरहेको छ भने उक्त घटनाको हालसम्म कसैले जिम्मा नलिएको प्रहरीले जनाएको छ ।